សិស្សសាលា កូរ៉េខាងជើង ប្រមូលផ្ដុំគ្នាគាំទ្រការសម្រេចចិត្តសំខាន់ៗ នៃកិច្ចប្រជុំបក្សពលករ

យោងតាមប្រព័ន្ធផ្សព្វផ្សាយរដ្ឋនៅថ្ងៃព្រហស្បតិ៍នេះបានឲ្យដឹងថា ប្រទេសកូរ៉េខាងជើងបានប្រារព្ធការប្រមូលផ្តុំគ្នាដ៏ធំមួយនៅក្នុងទីក្រុងព្យុងយ៉ាងកាលពីដើមសប្តាហ៍នេះ ដោយមានការចូលរួមពីប្រជាពលរដ្ឋ សិស្សសាលា និងមន្ត្រីកំពូលមួយចំនួនដើម្បីគាំទ្រការសម្រេចចិត្តសំខាន់ៗពីកិច្ចប្រជុំគណបក្សនាពេលថ្មីៗនេះ ។

បន្ទាប់ពីបញ្ចប់សម័យប្រជុំពេញអង្គរបស់គណបក្សពលករកាលពីចុងឆ្នាំមុន កូរ៉េខាងជើងបានគូសបញ្ជាក់អំពីអាទិភាពគោលនយោបាយរបស់ខ្លួនសម្រាប់ឆ្នាំថ្មីលើការអភិវឌ្ឍន៍សេដ្ឋកិច្ចជាតិ និងជំរុញកិច្ចខិតខំប្រឹងប្រែងប្រឆាំងកូវីដ ។

ទន្ទឹមនោះ ទីភ្នាក់ងារសារព័ត៌មានកណ្តាលកូរ៉េ (KCNA) បាននិយាយថា “ដើម្បីសម្រេចឲ្យបានហ្មត់ចត់នូវការសម្រេចចិត្តនៃកិច្ចប្រជុំពេញអង្គលើកទី ៤ នៃគណៈកម្មាធិការមជ្ឈិមទី ៨ របស់បក្សពលករ ការប្រមូលផ្តុំគ្នានៅទីក្រុងព្យុងយ៉ាងត្រូវបានធ្វើឡើងនៅទីលានលោក គីម អ៊ីលស៊ុង កាលពីថ្ងៃពុធ” ។

ក្នុងនោះមន្ត្រី និងកម្មករនៃរោងចក្រ ក្រុមហ៊ុន និងកសិដ្ឋានសហករណ៍ក្នុងទីក្រុងព្យុងយ៉ាង ក៏ដូចជាសិស្សានុសិស្សបានចូលរួមក្នុងព្រឹត្តិការណ៍នេះផងដែរ ។

មន្ត្រីជាន់ខ្ពស់ទទួលបន្ទុកផ្នែកសេដ្ឋកិច្ច រួមទាំងលោកនាយករដ្ឋមន្ត្រី Kim Tok-hun ក៏មានវត្តមានផងដែរ ដោយបានលើកឡើងថា ការជួបជុំនេះគឺមានគោលបំណងលើកទឹកចិត្តដល់វឌ្ឍនភាពក្នុងកិច្ចខិតខំប្រឹងប្រែងសេដ្ឋកិច្ច ។

គួរបញ្ជាក់ថា ប្រទេសកូរ៉េខាងជើងបានផ្តោតការយកចិត្តទុកដាក់លើការអភិវឌ្ឍន៍សេដ្ឋកិច្ចរបស់ខ្លួន ជាពិសេសវិស័យកសិកម្ម ចំពេលមានការគ្រប់គ្រងព្រំដែនយ៉ាងតឹងរ៉ឹងប្រឆាំងនឹងកូវីដ និងទណ្ឌកម្មអន្តរជាតិ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ បើកភ្នែកធំៗ ពេលដឹងប្រភេទមីស៊ីល កូរ៉េខាងជើង បាញ់ម្សិលមិញ