វៀតណាម សុំឲ្យក្រុមហ៊ុននាំចេញ ឈប់ដឹកទំនិញទៅព្រំដែន ចិន

អាជ្ញាធរខេត្ត Lang Son បានស្នើឲ្យក្រុមហ៊ុននាំចេញទូទាំងប្រទេស បញ្ឈប់ការដឹកជញ្ជូនទំនិញទៅកាន់ព្រំដែនវៀតណាម ជាប់ប្រទេសចិន រហូតដល់ពិធីបុណ្យចូលឆ្នាំចិន នៅដើមខែកុម្ភៈ។

សំណើនេះត្រូវបានបញ្ជូនទៅកាន់ទីក្រុង និងខេត្តនានាកាលពីថ្ងៃទី ៤ខែធ្នូ ខណៈរថយន្តកុងតឺន័រចំនួន ២,៤៦០គ្រឿងដែលក្នុងនោះមាន ៦០ភាគរយដឹកផ្លែឈើស្រស់ នៅតែជាប់គាំងនៅច្រកព្រំដែនក្នុងខេត្ត Lang Son។

ចំពេលមានការផ្ទុះឡើងនៃមេរោគកូវីដ១៩នាពេលថ្មីៗនេះ ប្រទេសចិនបានរឹតបន្តឹងការត្រួតពិនិត្យលើទំនិញនាំចូល និងការដឹកជញ្ជូន ដែលជាហេតុបង្កឲ្យមានការកកស្ទះរថយន្តកុងតឺន័ររបស់វៀតណាម នៅតាមច្រកព្រំដែនក្នុងរយៈពេលមួយខែកន្លងមកនេះ។

កាល​ពី​ចុង​សប្តាហ៍​មុន រដ្ឋាភិបាល​វៀតណាម​បាន​ណែនាំ​ក្រសួង​និង​វិស័យ​ចំនួន៩ ឲ្យ​រួម​គ្នា​ដោះស្រាយ​ការ​កកស្ទះ​ទំនិញ​នៅខេត្ត Lang Son និង​ខេត្ត​ជាប់​ព្រំដែន​ភាគ​ខាងជើង​ផ្សេងទៀត។

ការនាំចេញកសិផលរបស់វៀតណាមទៅកាន់ប្រទេសចិន បានជាប់គាំងជាច្រើនលើកច្រើនសារក្នុងឆ្នាំនេះ ដោយសារតែការរឹតបន្តឹងទាក់ទងនឹងកូវីដ។

ប្រទេសចិន គឺជាដៃគូពាណិជ្ជកម្មកំពូលមួយរបស់វៀតណាម។ ចំណូលនៃការនាំចេញនាំចូល នៃផលិតផលកសិកម្ម រុក្ខាប្រមាញ់ នេសាទរវាងប្រទេសទាំងពីរ បានកើនឡើងយ៉ាងខ្លាំងពី ៨ពាន់លានដុល្លារក្នុងឆ្នាំ២០១៥ ដល់ ១១ពាន់លានដុល្លារកាលពីឆ្នាំមុន។

ប្រទេសចិនក៏ជាទីផ្សារនាំចេញធំទីពីររបស់វៀតណាមសម្រាប់ផលិតផលកសិកម្ម រុក្ខាប្រមាញ់ និងនេសាទ ផងដែរ បន្ទាប់ពីសហរដ្ឋអាមេរិក ដោយបានប្រកាសចំណូលពីការនាំចេញចំនួន ៨.៤ពាន់លានដុល្លារក្នុងរយៈពេល១១ខែដំបូងនៃឆ្នាំនេះ ដែលស្មើនឹង១៩,២ភាគរយនៃការនាំចេញកសិផលសរុបរបស់វៀតណាម៕

ប្រែសម្រួល៖ Vann Vann

ប្រភព៖ VN Express