WHO មិនទាន់ទទួលស្គាល់ Deltacron ជាវីរុសបំប្លែងខ្លួនថ្មីទេ

កាលពីសប្តាហ៍មុនទីភ្នាក់ងារព័ត៌មានអន្តរជាតិបានរាយការណ៍ថា អ្នកវិទ្យាសាស្ត្រនៅប្រទេសស៊ីបបានរកឃើញវីរុសកូវីដបំប្លែងខ្លួនថ្មី ដែលជាវីរុសកូនកាត់រវាង Delta និង Omicron ។

បន្ទាប់មកអ្នកវិទ្យាសាស្ត្របានដាក់ឈ្មោះវាថា “Deltacron” ។ ទោះយ៉ាងណាក៏ដោយរហូតមកដល់ពេលនេះអង្គការសុខភាពពិភពលោក (WHO) មិនបានកំណត់អត្តសញ្ញាណ និងទទួលស្គាល់ Deltacron ជាវីរុសបំប្លែងខ្លួនថ្មីនៅឡើយទេ ។

ទន្ទឹមនោះ លោកវេជ្ជបណ្ឌិត Chalermchai Boonyaleepun អនុប្រធានគណៈកម្មការសុខភាពសាធារណៈថៃបាននិយាយថា មនុស្សមិនគួរភ័យស្លន់ស្លោចំពោះវីរុសបំប្លែងខ្លួនថ្មីនេះនោះទេ ព្រោះវាប្រហែលជាមិនកើតមានទៀតនោះទេ ។

លោកបញ្ជាក់ថា ប្រសិនបើវីរុសបំប្លែងខ្លួនថ្មីនេះត្រូវចាត់ទុកថាសារៈសំខាន់ ហើយនឹងប៉ះពាល់ដល់មនុស្សជាតិ WHO នឹងដាក់ឈ្មោះវាដោយប្រើអក្ខរក្រិក ហើយរហូតមកដល់ពេលនេះ WHO បានប្រើប្រាស់អក្ខរក្រិកត្រឹមទី ១៥ គឺ Omicron ជាវីរុសបំប្លែងខ្លួនចុងក្រោយប៉ុណ្ណោះ ។

លោក Chalermchai បាននិយាយថា ដូច្នេះហើយមនុស្សមិនគួរជឿអ្វីៗទាំងអស់នោះទេ ព្រោះអ្វីដែលគេហៅថា Deltacron ជាវីរុសបំប្លែងខ្លួនថ្មីគឺមិនទាន់ត្រូវបានផ្ទៀងផ្ទាត់នៅឡើយទេ ។ ប្រសិនបើវាពិតជាវីរុសបំប្លែងខ្លួនថ្មីមែននោះ វាចាំបាច់ត្រូវវាយតម្លៃដោយផ្អែកលើវិមាត្រទាំងបីរបស់គណៈកម្មការសុខភាពសាធារណៈ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ មកថ្មីទៀតហើយ! លើកនេះជា វីរុសបំប្លែងខ្លួន កូនកាត់ Delta ជាមួយ Omicron (មានវីដេអូ)