WHO ជំរុញឲ្យប្រើឧបករណ៍តេស្តរហ័សរកកូវីដក្នុងសាលារៀន ដើម្បីការពារការផ្ទុះ អូមីក្រុង

អង្គការសុខភាពពិភពលោក (WHO) បាននិយាយថា ការធ្វើតេស្តរកជំងឺកូវីដ ១៩ គួរតែត្រូវបានអនុវត្តនៅក្នុងសាលារៀន ទោះបីជាគ្មានករណីណាមួយត្រូវបានរកឃើញក៏ដោយ ដើម្បីចៀសវាងផលប៉ះពាល់នៃការសិក្សាពីចម្ងាយ ឬតាមអនឡាញ និងដើម្បីការពារការផ្ទុះវីរុសបំប្លែងខ្លួន អូមីក្រុង ផងដែរ ។

ការពិនិត្យ និងការធ្វើតេស្តនៅតាមសាលាត្រូវបានគេណែនាំឲ្យធ្វើ ហើយឥឡូវនេះ WHO ជឿជាក់ថា ការធ្វើតេស្តតាម PCR ឬតាមឧបករណ៍តេស្តរហ័ស (Rapid Antigen Tests) គួរតែត្រូវបានផ្តល់ឲ្យក្នុងករណីដែលមិនមានរោគសញ្ញា ក្នុងចំណោមសិស្ស និងបុគ្គលិកសាលារៀន ។

លោក Hans Kluge នាយកប្រចាំតំបន់របស់ WHO នៅទ្វីបអឺរ៉ុប បាននិយាយក្នុងសេចក្ដីថ្លែងការណ៍រួមជាមួយអង្គការ UNICEF និង UNESCO ថា “អនុសាសន៍ណែនាំនេះ ផ្តល់នូវឱកាសដ៏មានតម្លៃសម្រាប់រដ្ឋាភិបាល ក្នុងការដាក់ចេញនូវវិធានការណ៍ត្រឹមត្រូវ ដែលនឹងជួយរក្សាអត្រាឆ្លងជំងឺ និងកាត់បន្ថយការឆ្លងទៅក្នុងសាលារៀន និងដើម្បីបើកសាលារៀនឡើងវិញផងដែរ” ។

លោកបានបន្ថែមថា ការបិទសាលាដូចដែលយើងបានឃើញ គឺមានឥទ្ធិពលអាក្រក់បែបនេះទៅលើការអប់រំ សុខមាលភាពសង្គម និងផ្លូវចិត្តរបស់កុមារ និងយុវជនរបស់យើង ។

លោក Kluge បានបញ្ជាក់ថា “យើងមិនអាចអនុញ្ញាតឲ្យការរីករាលដាលនៃជំងឺរាតត្បាត ប្លន់យកការអប់រំ និងការអភិវឌ្ឍន៍របស់ពួកគេបានទេ” ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ UNICEF៖ ការបិទសាលារៀន ត្រូវតែជាជម្រើសចុងក្រោយក្នុងការប្រយុទ្ធជាមួយ អូមីក្រុង