ព័ត៌មានអន្ដរជាតិ

ទីក្រុងអ៊ូហ្គង់ដាមួយហាមស្ត្រីអង្គុយកៅអីមុខក្នុងឡានដឹកទំនិញ ខ្លាចគ្រោះថ្នាក់ចរាចរណ៍ព្រោះស្លៀកខ្លី

បានផុស

៣ years មុន

នៅ

ថ្ងៃព្រហស្បតិ៍ ២០ មករា ២០២២

ដោយ

សមាគមពាណិជ្ជករមួយនៅភាគខាងជើងប្រទេសអ៊ូហ្គង់ដាបានហាមស្ត្រីអង្គុយកៅអីខាងមុខរថយន្តដឹកទំនិញ ដោយសារសំពត់ខ្លី និងភ្លៅរបស់ស្ត្រីអាចបង្កបញ្ហាដល់អ្នកបើកបរ។

បំរាមនេះត្រូវបានដាក់ចេញនៅទីក្រុង Lira ដើម្បីហាមស្ត្រីភេទ សូម្បីតែភរិយារបស់អ្នកបើកបរក៏មិនអនុញ្ញាតឲ្យអង្គុយកៅអីមុខក្នុងរថយន្តដឹកទំនិញដែរ។

សមាគមមួយតំណាងឲ្យថ្នាក់ដឹកនាំ និងពាណិជ្ជករក្នុងស្រុកបាននិយាយថា ការសម្រេចហាមស្ត្រីអង្គុយនៅកៅអីមុខគឺត្រូវបានធ្វើឡើងដោយផ្អែកលើហេតុផលសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Patrick Opio Obote អគ្គនាយកពាណិជ្ជករទីផ្សារចល័តរបស់ទីក្រុង Lira បានប្រាប់ទីភ្នាក់ងារសារព័ត៌មាន AFP កាលពីថ្ងៃពុធថា ៖«អ្នកខ្លះស្លៀតសំពត់ខ្លីដែលចេញគល់ភ្លៅ និងទាក់ភ្នែកអ្នកបើកបរ ដូច្នេះអ្នកបើកបរអាចបែកអារម្មណ៍បង្កជាគ្រោះថ្នាក់ទាំងខ្លួនឯង និងដល់អ្នកដទៃ»។

«បំរាមចាប់មានប្រសិទ្ធភាពជាបន្ទាន់ ហើយអ្នកបើកបរ និងអ្នកដំណើរទាំងអស់ត្រូវតែអនុវត្តតាម»។ លោកបានបន្ថែម។

លោក Obote បានឲ្យដឹងថា ការសម្រេចចិត្តនេះត្រូវបានធ្វើឡើង បន្ទាប់ពីការសិក្សាស្រាវជ្រាវពីមូលហេតុដែលបង្កឲ្យមានគ្រោះថ្នាក់ចរាចរណ៍នៅតំបន់នោះពាក់ព័ន្ធនឹងអ្នកបើកបររថយន្តដឹកទំនិញ។

លោកបន្តថា ៖«យើងបានស្វែងរកឃើញការបើកបរហួសល្បឿន និងមិនគោរពច្បាប់ចរាចរណ៍របស់អ្នកបើករថយន្តដឹកទំនុញ។ ស្ត្រីខ្លះអង្គុយនៅខាងមុខជិតអ្នកបើកបរស្លៀកខ្លី អ្នកបើកបរខ្លះងងុយដេក ឬស្រវឹងស្រាបានភាំងស្មារតីបង្កគ្រោះថ្នាក់»។

បំរាមត្រូវបានធ្វើឡើង បន្ទាប់ពីគ្រោះថ្នាក់ចរាចរណ៍មួយកាលពីថ្ងៃទី១០ ខែមករាបានសម្លាប់ពាណិជ្ជករ៩នាក់ និងរបួស២០នាក់នៅពេលរថយន្តដឹកទំនិញមួយគ្រឿងត្រឡប់ពីផ្សារប្រចាំសប្តាហ៍នៅជិតទីក្រុងបានក្រឡាប់៕

ប្រែសម្រួល៖ វីរបុត្រ
ប្រភព៖ AFP

Related Topics:ប្រទេសអ៊ូហ្គង់ដា