រថយន្តដឹកមីន ជួបគ្រោះថ្នាក់ចរាចរណ៍នៅ ហ្គាណា បង្កជាការផ្ទុះដ៏អន្តរាយ

រថយន្តដឹកគ្រឿងផ្ទុះដែលប្រើក្នុងការរុករករ៉ែ បានបុកជាមួយម៉ូតូមួយគ្រឿង ហើយផ្ទុះឡើងនៅភាគខាងលិចប្រទេសហ្គាណា ដោយបណ្តាលឲ្យមនុស្សច្រើននាក់ស្លាប់ និងច្រើននាក់ទៀតរងរបួស។

ការផ្ទុះបានកើតឡើងនៅក្រុង Apiate ចន្លោះទីប្រជុំជន Bogoso និង Bawdie ក្នុងតំបន់ភាគខាងលិចប្រទេស ខណៈរថយន្តដឹកគ្រឿងផ្ទុះកំពុងធ្វើដំណើរទៅកាន់អណ្តូងរ៉ែមាស Chirano ដែលដំណើរការដោយក្រុមហ៊ុន Kinross មានមូលដ្ឋាននៅប្រទេសកាណាដា។

វីដេអូពីកន្លែងកើតហេតុដែលបង្ហោះលើប្រព័ន្ធផ្សព្វផ្សាយសង្គមកាលពីថ្ងៃព្រហស្បតិ៍ទី២០ខែមករា បានបង្ហាញពីតំបន់ផ្ទុះ ដោយអគារជាច្រើនត្រូវកម្ទេច បាក់រលំក្លាយជាសំណល់។

ប៉ូលិសបានចេញសេចក្តីថ្លែងការណ៍មួយដោយនិយាយថា “ការស៊ើបអង្កេតបឋមបានរកឃើញថា រថយន្តដឹកមីន បានបុកជាមួយម៉ូតូដែលបណ្តាលឲ្យមានការផ្ទុះនេះ”។

សាធារណជន​ត្រូវ​បាន​ណែនាំឲ្យ​ចាក​ចេញពី​តំបន់កើតហេតុ ​ទៅកាន់​ទីប្រជុំជន​នានានៅក្បែរ​នោះ​ដើម្បី​សុវត្ថិភាព​របស់​ពួកគេ ខណៈ​កិច្ចប្រឹងប្រែង​សង្គ្រោះ​កំពុង​ដំណើរការ​។

លោក Seji Saji Amedonu អគ្គនាយករងនៃអង្គការគ្រប់គ្រងគ្រោះមហន្តរាយជាតិ (NADMO) បាននិយាយថា អគារចំនួន ៥០០ ត្រូវបានបំផ្លាញ។

ស្របពេលជាមួយគ្នានោះ មន្ត្រី​គ្រាអាសន្ន​ប្រចាំ​តំបន់ក៏​បាន​ប្រាប់​ប្រព័ន្ធ​ផ្សព្វផ្សាយ​ក្នុងស្រុក​ផងដែរថា លោក​បាន​ឃើញ​សាកសព​មនុស្សចំនួន​១០​នាក់​៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ រថយន្តដឹកប្រេងកំពុងឆេះ បែរនាំគ្នាទៅប្រមូលប្រេងធ្លាយ ស្រាប់តែផ្ទុះស្លាប់ជាង៦០នាក់ នៅហៃទី