កូរ៉េខាងត្បូងញាប់ដៃញាប់ជើងសាងសង់គ្រែមន្ទីរពេទ្យក្នុងទូកុងតឺន័រ ដើម្បីទប់ទល់កូវីដ រលកទីបី

អាជ្ញាធរកូរ៉េខាងត្បួងកាលពីថ្ងៃព្រហស្បតិ៍ ទី ១០ ខែធ្នូ បានសាងសង់គ្រែមន្ទីរពេទ្យក្នុងទូកុងតឺន័រដើម្បីបន្ធូរបន្ថយគ្រឿងបរិក្ខារពេទ្យដើម្បីត្រៀមទប់ទល់រលកទី ៣ នៃករណីឆ្លងជំងឺកូវីដ ១៩ ខណៈមានករណីឆ្លងថ្មី ៦៨២ ករណី ។

ការលេចចេញករណីឆ្លងថ្មីៗនេះធ្វើឲ្យមានការព្រួយបារម្ភអំពីការខ្វះខាតគ្រែមន្ទីរពេទ្យដែលជំរុញឲ្យទីក្រុងសេអ៊ូលចាប់ផ្តើមតំឡើងគ្រែក្នុងទូកុងតឺន័រជាលើកដំបូងចាប់តាំងពីការចាប់ផ្តើមរោគរាតត្បាត ។

អាជ្ញាធរសុខាភិបាលគ្រោងនឹងបង្កើនការធ្វើតេស្តដោយចាប់ផ្ដើមបើកដំណើរការនៅទីតាំងបណ្តោះអាសន្នប្រហែល ១៥០ កន្លែងនៅទូទាំងតំបន់ក្រុងសេអ៊ូល ។

រដ្ឋមន្រ្តីក្រសួងសុខាភិបាល Park Neung-hoo បានប្រាប់កិច្ចប្រជុំមួយថា “យើងកំពុងប្រឹងប្រែងអស់ពីសមត្ថភាពដើម្បីបញ្ឈប់ការរីករាលដាលនៅក្នុងតំបន់ទីក្រុងសេអ៊ូលដោយប្រមូលធនធានដែលមានទាំងអស់ ។ សំខាន់ជាងនេះទៅទៀត យើងនឹងទទួលបានមណ្ឌលព្យាបាលគ្រប់គ្រាន់ និងគ្រែមន្ទីរពេទ្យសម្រាប់ករណីធ្ងន់ធ្ងរដូច្នេះពួកគេអាចទទួលការព្យាបាលទាន់ពេលវេលា” ។

យោងតាមទីភ្នាក់ងារទប់ស្កាត់ និងបង្ការជំងឺកូរ៉េបានឲ្យដឹងថា ការឆ្លងថ្មីចំនួន ៦៨២ ករណីនៅថ្ងៃព្រហស្បតិ៍នេះបានកើតឡើងមួយថ្ងៃ បន្ទាប់ពីករណីឆ្លងប្រចាំថ្ងៃបានកើនឡើងដល់ ៦៨៦ ករណីដែលជាអត្រាខ្ពស់បំផុតទី ២ ចាប់តាំងពីករណីដំបូងរបស់ប្រទេសត្រូវបានបញ្ជាក់កាលពីខែមករា ។

គួរបញ្ជាក់ថា គិតត្រឹមថ្ងៃពេលនេះប្រទេសកូរ៉េខាងត្បូងមានករណីឆ្លងជំងឺកូវីដ ១៩ ចំនួន ៤០,០៩៨ ករណី និងមានអ្នកស្លាប់ចំនួន ៥៦៤ នាក់ ខណៈអ្នកជាសះស្បើយមានចំនួន ៣០,៦៣៧ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS