ក្រុមបងធំប្រយុទ្ធគ្នា បង្កជាអគ្គិភ័យនៅហាងខារ៉ាអូខេឥណ្ឌូណេស៊ី ស្លាប់មនុស្ស១៩នាក់ 

មនុស្សយ៉ាងតិច១៩នាក់បានស្លាប់ នៅពេលអគ្គិភ័យឆាបឆេះយ៉ាងសន្ធោសន្ធៅក្នុងហាងខារ៉ាអូខេមួយកន្លែង បន្ទាប់ពីមានការប៉ះទង្គិចគ្នារវាងក្រុមបងធំនៅប្រទេស ឥណ្ឌូណេស៊ី។

មន្ត្រីប៉ូលិសក្នុងខេត្ត Sorong បាននិយាយថា មនុស្សម្នាក់ត្រូវបានចាក់សម្លាប់នៅពេលការប្រយុទ្ធគ្នាកើតឡើងដំបូងកាលពីព្រឹកថ្ងៃអង្គារទី២៥ខែមករានេះ មុនពេលក្លិបនៅខេត្ត West Papua ត្រូវបានដុតឆេះ​ ទាំងមានមនុស្ស១៨នាក់ជាប់នៅខាងក្នុង។

លោក Adam Erwini អ្នកនាំពាក្យប៉ូលិសខេត្ត West Papua បានប្រាប់ទូរទស្សន៍ Metro TV ថា “ការប្រយុទ្ធគ្នាក្នុងចំណោមយុវជននៅក្នុងទីក្រុង Sorong គឺជារឿងធម្មតាទៅហើយ ប៉ុន្តែនេះជាលើកទី១ហើយដែលបានបណ្តាលឲ្យមានអ្នកស្លាប់ច្រើនបែបនេះ”។

លោក Erwini បន្តថា ឧបទ្ទវហេតុដែលបណ្តាលឲ្យមានមនុស្សស្លាប់នៅក្លិបរាត្រី Double O ក្នុងទីក្រុង Sorong គឺនៅតែស្ថិតក្រោមការស៊ើបអង្កេត ហើយគេមិនច្បាស់ទេថាតើចំនួនអ្នកស្លាប់នឹងកើនឡើងឬយ៉ាងណា។

ដោយឡែក​លោក Dedi Prasetyo អ្នក​នាំពាក្យ​ប៉ូលិស​ជាតិ​ឥណ្ឌូណេស៊ី​បាន​និយាយ​ថា ការ​វាយ​ប្រហារ​នេះ​គឺ​រវាង​ក្រុម​ក្មេង​ទំនើង​ពីរ​ក្រុម​ដែល​មក​ពី​កោះ Maluku។ រថយន្ត​នៅ​ខាង​ក្រៅ​ខារ៉ាអូខេក៏​ត្រូវ​បាន​ភ្លើង​ឆេះផងដែរ ​អំឡុង​ពេល​មាន​ជម្លោះ៕

ប្រែសម្រួល៖ Vann Vann

ប្រភព៖ Mirror

ចុចអាន៖ មកមើលវីដេអូ និងរូបភាពរន្ធត់ពីការផ្ទុះភ្នំភ្លើងនៅ ឥណ្ឌូណេស៊ី