អាមេរិក នឹងដាក់ទណ្ឌកម្មលោក ពូទីន ដោយផ្ទាល់ បើរុស្ស៊ីឈ្លានពាន អ៊ុយក្រែន (មានវីដេអូ)

ប្រធានាធិបតីអាមេរិកលោក ចូ បៃដិន បាននិយាយថា លោកនឹងពិចារណាលើការដាក់ទណ្ឌកម្មផ្ទាល់ខ្លួនលើលោក វ្លាឌីមៀរ ពូទីន ប្រសិនបើរុស្ស៊ីឈ្លានពានអ៊ុយក្រែន។

លោក បៃដិន លើកឡើង​ថា ​នឹង​មាន​ផលវិបាក​ដ៏​ធំ​សម្បើមសម្រាប់​ពិភពលោក ប្រសិនបើ​រុស្ស៊ីលុកលុយប្រជាជាតិ ​ដែល​ស្ថិត​នៅ​​ព្រំដែន​ភាគ​និរតី​របស់​ខ្លួន ហើយអាចបង្កទៅជាការឈ្លានពានដ៏ធំបំផុត ចាប់តាំងពីសង្គ្រាមលោកលើកទី២មក។

លោក បៃដិន ​បន្ថែម​ថា លោក​មាន​អារម្មណ៍​ថា ​មាន​កាតព្វកិច្ចសម្រាប់អង្គការណាតូ ក្នុងការ​ពង្រឹង​វត្តមាន​កងទ័ពនៅ​អឺរ៉ុប​ខាង​កើត។ 

“យើងត្រូវតែបញ្ជាក់ឲ្យច្បាស់ថា គ្មានហេតុផលសម្រាប់នរណាម្នាក់ ឬសមាជិកណាតូណាមួយ ព្រួយបារម្ភថាតើណាតូនឹងមកការពារពួកគេដែរឬក៏អត់នោះទេ”។

ការអត្ថាធិប្បាយរបស់លោកបានកើតឡើង ចំពេលដែលមេដឹកនាំលោកខាងលិចផ្សេងទៀតបានព្រមានម្តងហើយម្តងទៀតថា ប្រទេសរុស្ស៊ីនឹងទទួលបានការតបស្នងដ៏ធ្ងន់ធ្ងរ សម្រាប់ការឈ្លានពាន។

រុស្ស៊ី​បាន​ចោទប្រកាន់​អាមេរិក និង​ប្រទេស​ដទៃ​ទៀត​ថា កំពុង​បង្កើន​ភាព​តានតឹង​ជុំវិញ​បញ្ហា​នេះ ហើយ​បដិសេធ​ថា ​ខ្លួនគ្មានគគម្រោង​ចូលលុកលុយប្រទេស​អ៊ុយក្រែនឡើយ។

ទោះបីជាយ៉ាងណាក៏ដោយ ទីក្រុងមូស្គូបានកសាងកងទ័ពនៅតាមព្រំដែន ដោយមានទាហានរុស្ស៊ីប្រហែល១០០,០០០នាក់ ត្រូវបានដាក់ពង្រាយនៅក្នុងតំបន់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ មេដឹកនាំលោកខាងលិច ប្រកាសពួតដៃគ្នាប្រឆាំង រុស្ស៊ី