អូមីក្រុង​ មានសមាជិកគ្រួសារចំនួន៤ កំពុងអុកឡុកពិភពលោក

អង្គការសុខភាពពិភពលោក (WHO) បានព្រមានថា ឥឡូវនេះមានវីរុសបំប្លែងខ្លួន អូមីក្រុង ចំនួនបួនប្រភេទផ្សេងគ្នា ដែលកំពុងចរាចរណ៍នៅជុំវិញពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេរោគភាគច្រើន គឺស្រដៀងទៅនឹងវីរុសកូវីដបំប្លែងខ្លួនមុនៗដែលនេះមានន័យថា ពួកគេមិនមានផលប៉ះពាល់បន្ថែម លើភាពធ្ងន់ធ្ងរឬប្រព័ន្ធភាពស៊ាំនោះទេ។

ទម្រង់ដែលគេស្គាល់ដំបូងរបស់ អូមីក្រុង គឺ B.1.1.529 ហើយប្រភេទនេះ ត្រូវបាន WHO ចាត់ទុកថាជា វីរុសបំប្លែងខ្លួនគួរឲ្យព្រួយបារម្ភ។

បន្ទាប់មក វាបានវិវត្តទៅជាប្រភេទពីរដាច់ដោយឡែកពីគ្នា ដោយ BA.1 ក្លាយជាមេរោគឆ្លងសាហាវជាងគេ ដែលរីករាលដាលដល់១៧១ប្រទេសហើយ។

ឥឡូវនេះ BA.2 និង BA.3 ត្រូវ​បាន​ចុះបញ្ជីថា​ជាសមាជិក​ថ្មី​ក្នុង​គ្រួសារ អូមីក្រុង ទោះបច្ចុប្បន្នមិនសូវមានការឆ្លងច្រើន ជាពិសេសសម្រាប់ប្រភេទ BA.3 ក៏ដោយ។

របាយការណ៍របស់ WHO បាននិយាយកាលពីថ្ងៃសុក្រសប្តាហ៍មុនថា “ថ្វីបើពូជ BA.1 ធ្លាប់ជាមេរោគលេចធ្លោបំផុតក៏ដោយ ប៉ុន្តែករណីបច្ចុប្បន្ននៅប្រទេសឥណ្ឌា អាហ្រ្វិកខាងត្បូង ចក្រភពអង់គ្លេស និងដាណឺម៉ាកបានបង្ហាញថា BA.2 ក៏កំពុងកើនឡើងផងដែរ”។

ទីភ្នាក់ងារសន្តិសុខសុខភាពចក្រភពអង់គ្លេស (UKHSA) បានបញ្ជាក់ថា មេរោគនេះត្រូវបានចាត់ថ្នាក់ថាជា មេរោគបំប្លែងខ្លួនស្ថិតក្រោមការស៊ើបអង្កេត៕

ប្រែសម្រួល៖ Vann Vann

ប្រភព៖ Daily Star

ចុចអាន៖ វីរុសបំប្លែងខ្លួនក្លាយពូជថ្មី ឆ្លងខ្លាំងជាងអូមីក្រុង ចូលដល់ ថៃ ហើយ