មេដឹកនាំអ៊ុយក្រែន បញ្ជាឲ្យស៊ើបអង្កេត ការបាញ់សម្លាប់រង្គាលនៅរោងចក្រមីស៊ីល

ប្រធានាធិបតីអ៊ុយក្រែនលោក Volodymyr Zelensky កាលពីថ្ងៃព្រហស្បតិ៍ទី២៧ខែមករា បានបញ្ជាឲ្យប៉ូលិសស៊ើបអង្កេតលើការបាញ់ប្រហារសម្លាប់រង្គាលមួយ ជាស្នាដៃរបស់សមាជិកឆ្មាំជាតិ ដែលបណ្តាលឲ្យមនុស្សចំនួន៥នាក់ស្លាប់និងច្រើននាក់ទៀតរងរបួស។

នៅក្នុងអំពើហិង្សាដ៏អាក្រក់បំផុតរបស់សេវាកម្មសន្តិសុខអ៊ុយក្រែន ក្នុងរយៈពេលជាច្រើនឆ្នាំមកនេះ, ទាហានឆ្មាំជាតិអាយុ២១ឆ្នាំម្នាក់បានបើកការបាញ់ប្រហារនៅរោងចក្រមីស៊ីល Pivdenmash កាលពីព្រឹកព្រលឹមថ្ងៃព្រហស្បតិ៍។

ក្រោយមក ខ្មាន់កាំភ្លើងឈ្មោះ Artem Ryabchuk អាយុ២១ឆ្នាំ ត្រូវបានចាប់ខ្លួន បន្ទាប់ពីអាជ្ញាធរតាមប្រមាញ់អស់រយៈពេលមួយម៉ោង។

ការវាយប្រហារនេះកើតឡើង ចំពេលដែលអ៊ុយក្រែនកំពុងស្ថិតក្នុងការប្រុងប្រយ័ត្នខ្ពស់ ខណៈរុស្ស៊ីដាក់ទ័ពរាប់ម៉ឺននាក់នៅព្រំដែនរបស់ប្រទេសអតីតសូវៀតមួយនេះ ប៉ុន្តែភ្លាមៗ មិនទាន់មានការចង្អុលបង្ហាញអំពីទំនាក់ទំនងរវាងការបាញ់ប្រហារនេះ ជាមួយនឹងការគំរាមកំហែងរបស់រុស្ស៊ីនៅឡើយទេ។

នៅក្នុងសេចក្តីថ្លែងការណ៍មួយ លោក Zelensky បានហៅការបាញ់ប្រហារនៅក្នុងទីក្រុងឧស្សាហកម្ម Dnipro ថា “គួរឲ្យភ័យខ្លាច” ហើយបានផ្ញើសាររំលែកទុក្ខដល់មិត្តភក្តិ និងក្រុមគ្រួសាររបស់ជនរងគ្រោះ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ អ៊ុយក្រែន ទម្លាយវីដេអូបាញ់សម្លាប់មនុស្សស្តែងៗ នៅរោងចក្រមីស៊ីលម្សិលមិញ