ពេទ្យ អាមេរិក មិនវះកាត់ប្ដូរបេះដូងអ្នកជំងឺណាដែលមិនចាក់វ៉ាក់សាំងកូវីដ (មានវីដេអូ)

ប៉ុស្តិ៍ទូរទស្សន៍អាមេរិកបានរាយការណ៍ថា មន្ទីរពេទ្យមួយក្នុងទីក្រុងបូស្តុនបានបដិសេធមិនធ្វើការវះកាត់ប្តូរបេះដូងលើអ្នកជំងឺដែលមិនបានចាក់វ៉ាក់សាំងការពារកូវីដ ។

អ្នកនាំពាក្យរបស់មន្ទីរពេទ្យ Brigham and Women’s Hospital បានបញ្ជាក់នៅក្នុងសេចក្តីថ្លែងការណ៍មួយទៅកាន់ AFP ថា ការចាក់វ៉ាក់សាំងការពារកូវីដគឺ “ទាមទារ” សម្រាប់អ្នកទទួលការប្តូរសរីរាង្គនៅទីនោះ ។

មន្ទីរពេទ្យតម្រូវឲ្យអ្នកជំងឺចាក់វ៉ាក់សាំងផ្សេងៗដែលត្រូវបានណែនាំដោយ CDC រួមទាំងវ៉ាក់សាំងការពារកូវីដផងដែរ ព្រោះវាជាឱកាសដ៏ល្អបំផុតសម្រាប់ការវះកាត់ជោគជ័យ និងដើម្បីបង្កើនប្រសិទ្ធភាពនៃការរស់រានមានជីវិតរបស់អ្នកជំងឺ បន្ទាប់ពីការប្តូរសរីរាង្គ ដោយសារតែពួកគេមានប្រព័ន្ធភាពស៊ាំស្រាប់” ។

ទន្ទឹមនោះលោក Arthur Caplan ដែលជាអ្នកជំនាញផ្នែកវេជ្ជសាស្រ្តនៅសាកលវិទ្យាល័យញូវយ៉កបានប្រាប់ CBS ថា “ប្រសិនបើប្រព័ន្ធភាពស៊ាំរបស់អ្នកត្រូវបានកាត់ផ្ដាច់ កូវីដអាចសម្លាប់អ្នកបាន” ។

លោក Caplan បាននិយាយថា “បច្ចុប្បន្នសរីរាង្គគឺខ្វះខាត ហើយយើងនឹងមិនចែកចាយវាទៅឲ្យអ្នកដែលមានឱកាសរស់រានមានជីវិតតិចនោះទេ ហើយយើងនឹងផ្ដល់ឲ្យអ្នកផ្សេងទៀតដែលបានចាក់វ៉ាក់សាំងការពារ ព្រោះពួកគេមានឱកាសរស់ប្រសើរជាង ក្រោយការវះកាត់” ។

គួរបញ្ជាក់ថា ការបដិសេធមិនវះកាត់ប្ដូរបេះដូងចំពោះអ្នកមិនចាក់វ៉ាក់សាំងកូវីដកើតឡើងប៉ុន្មានសប្ដាហ៍ប៉ុណ្ណោះ បន្ទាប់ពីគ្រូពេទ្យវះកាត់របស់សហរដ្ឋអាមេរិក បានទទួលជោគជ័យក្នុងការបញ្ចូលបេះដូងជ្រូកដែលបានកែប្រែហ្សែន ទៅក្នុងខ្លួនអ្នកជំងឺម្នាក់ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NDTV

ចុចអាន ៖ ប្រវត្តិសាស្រ្ត! គ្រូពេទ្យអាមេរិកជោគជ័យ វះកាត់ដាក់បេះដូងជ្រូក ចូលក្នុងខ្លួនមនុស្ស