ពេលនេះ ជំងឺប៉េស្តជ្រូកអាហ្វ្រិក កំពុងរាលដាលពេញប្រទេស ថៃ

រដ្ឋមន្ត្រីក្រសួងកសិកម្មរបស់ថៃបាននិយាយថា ពេលនេះជំងឺប៉េស្តជ្រូកអាហ្រ្វិក (AFS) កំពុងរីករាលដាលពាសពេញប្រទេសថៃ ។

បច្ចុប្បន្នជំងឺនេះបានឆ្លងដល់កសិដ្ឋានចិញ្ចឹមជ្រូក និងកន្លែងសត្តឃាតនៅក្នុងខេត្តចំនួន ១៣ របស់ថៃ ពោលនៅភាគកណ្តាល ភាគឦសាន និងភាគខាងត្បូង ។

ទន្ទឹមនោះ កសិដ្ឋានដែលមានមេរោគ និងតំបន់ជុំវិញក្នុងរង្វង់ ៥ គីឡូម៉ែត្រ ឥឡូវនេះត្រូវបានប្រកាសថាជាតំបន់រីករាលដាល ខណៈខេត្តដែលមានកសិដ្ឋានចិញ្ចឹមជ្រូក ឬកន្លែងសត្តឃាតដែលឆ្លងជំងឺទាំងនោះរួមមាន បាងកក, ខេត្ត Suphan Buri, Phang Nga, Nakhon Si Thammarat, Chumphon, Maha Sarakham, Mae Hong Son, Si Sa Ket, Khon Kaen, Prachuap Khiri Khan, Buri Ram, Nong Bua Lamphu និងខេត្ត Nakhon Pathom ។

ចំណែកមន្ត្រីបសុសត្វបាននិយាយថា ការធ្វើតេស្តរកគ្រុនក្តៅលើសត្វជ្រូក ប្រហែលជាមិនតែងតែរកឃើញជំងឺនេះនោះទេ ព្រោះជ្រូកដែលមានមេរោគនេះតែងតែស្លាប់ភ្លាមៗ បន្ទាប់ពីពួកវាឆ្លង ។

មន្ត្រីបាននិយាយថា ក្រោយមកសាកសពសត្វជ្រូកត្រូវបានបញ្ជូនទៅធ្វើតេស្តនៅមន្ទីរពិសោធន៍ពីសាកលវិទ្យាល័យ Chulalongkorn ទើបលទ្ធផលបញ្ជាក់ថា ជំងឺប៉េស្តជ្រូកអាហ្វ្រិកត្រូវបានរកឃើញនៅក្នុងសាកសពសត្វជ្រូកទាំងនោះពិតប្រាកដមែន ។

គួរបញ្ជាក់ថា នៅថ្ងៃទី ៣ ខែកុម្ភៈ ខាងមុខនាយកដ្ឋាន​អភិវឌ្ឍន៍​បសុសត្វ​ថៃនឹងទទួលបានដំបូន្មានពីប្រទេសចិន និងវៀតណាមអំពីរបៀបដោះស្រាយជាមួយជំងឺប៉េស្តជ្រូកអាហ្វ្រិក (ASF) ដោយសារតែប្រទេសទាំងនោះបានកម្ចាត់ជំងឺនេះកាលពីពេលកន្លងមក ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ ស្រុក ២ នៅ ថៃ កំពុងផ្ទុះជំងឺប៉េស្តជ្រូកអាហ្រ្វិក