វៀតណាម លែងធ្វើតេស្តរហ័សរកកូវីដ លើអ្នកដំណើរអន្តរជាតិហើយ

អ្នកដំណើរតាមជើងហោះហើរអន្តរជាតិដែលចូល និងចេញពីប្រទេសវៀតណាម នឹងមិនចាំបាច់ធ្វើតេស្តរហ័សរកវីរុសកូវីដ-១៩ មុន ឬក្រោយការហោះហើររបស់ពួកគេទៀតទេ។

កាលពីថ្ងៃសុក្រទី២៨ខែមករា ការិយាល័យរដ្ឋាភិបាល បានចេញឯកសារថ្មីមួយស្តីពីការអនុវត្តជើងហោះហើរអន្តរជាតិទៀងទាត់ ដែលដឹកអ្នកដំណើរទៅ និងមកប្រទេសវៀតណាម។

ឯកសារនេះ រួមបញ្ចូលការលុបចោលនូវលក្ខខណ្ឌដែលតម្រូវឲ្យអ្នកដំណើរអន្តរជាតិ ត្រូវតែធ្វើតេស្តរហ័សរកកូវីដ មុនឬក្រោយការហោះហើររបស់ពួកគេ។

ក្រុមហ៊ុនអាកាសចរណ៍ បានត្អូញត្អែរអំពីគុណវិបត្តិនៃតម្រូវការនេះ ចាប់តាំងពីមានការណែនាំកាលពីដើមឆ្នាំ២០២២មក។

នៅក្នុងឯកសារកាលពីថ្ងៃសុក្រ លោកឧបនាយករដ្ឋមន្ត្រី Pham Binh Minh ក៏បានអនុម័តផងដែរ លើការបង្កើនភាពញឹកញាប់នៃជើងហោះហើរពាណិជ្ជកម្មទៀងទាត់ ដែលដឹកអ្នកដំណើរទៅកាន់ប្រទេសជប៉ុន កូរ៉េខាងត្បូង និងតៃវ៉ាន់។

លើសពីនេះ វៀតណាមបានពង្រីកទីផ្សារនៅក្នុងកម្មវិធីសាកល្បង នៃការបន្តជើងហោះហើរទៅកាន់អឺរ៉ុប និងអូស្ត្រាលី ដើម្បីបំពេញតម្រូវការជន​ជាតិ​របស់ខ្លួន​នៅ​ក្រៅ​ប្រទេស​ ដែល​ចង់​វិល​ត្រឡប់​ទៅ​ស្រុក​កំណើត​ដើម្បី​អបអរ​បុណ្យ​ចូល​ឆ្នាំ​ថ្មី។

គួរបញ្ជាក់ថា ក្រសួងសុខាភិបាលបានរាយការណ៍ថា គិតត្រឹមថ្ងៃព្រហស្បតិ៍ទី២៨ខែមករា ប្រទេសវៀតណាមបានកត់ត្រាការឆ្លងជំងឺកូវីដ-១៩ ចំនួន ២,២០៣,២០៨ ករណី ដោយមានអ្នកជាសះស្បើយចំនួន ១,៩៤៥,៦១១ នាក់ និងស្លាប់ចំនួន ៣៧,២៩១ នាក់៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ វៀតណាម ព្រមានពីការប្រើប្រាស់ថ្នាំ Molnupiravir ប្រយ័ត្នគ្រោះថ្នាក់