វៀតណាម មិនឲ្យបាញ់កាំជ្រួចអបអរបុណ្យចូលឆ្នាំថ្មី

ក្រសួងសុខាភិបាលវៀតណាម (MoH) ឲ្យអាជ្ញាធរមូលដ្ឋានកុំរៀបចំការបាញ់កាំជ្រួចក្នុងឱកាសបុណ្យចូលឆ្នាំថ្មីដើម្បីធានាប្រសិទ្ធភាពនៃការបង្ការ និងទប់ស្កាត់ជំងឺកូវីដ ១៩ ។

ក្រសួងបាននិយាយថា ប្រសិនបើការបាញ់កាំជ្រួចត្រូវបានធ្វើឡើងនោះ ចាំបាច់ត្រូវសង្កេតមើលពិធីសារកូវីដដូចជា ពាក់ម៉ាស បាញ់ថ្នាំសម្លាប់មេរោគ គម្លាតសង្គម គ្មានការប្រមូលផ្ដុំជួបជុំគ្នា និងសេចក្តីប្រកាសសុខភាព ក៏ដូចជាដើម្បី​ធានា​ថា​មិន​មាន​ហ្វូង​មនុស្ស​នៅ​បរិវេណណាមួយ ​។

យោងតាម ​​MoH បានឲ្យដឹងថា ករណីឆ្លងសហគមន៍ថ្មីនៃជំងឺកូវីដ ១៩ នៅតែត្រូវបានកត់ត្រានៅក្នុងតំបន់ជាច្រើន ជាពិសេសតំបន់ដែលមានដង់ស៊ីតេប្រជាជនខ្ពស់ និងទីតាំងពាណិជ្ជកម្មមមាញឹក ស្របពេលដែលផ្ទុះវីរុសបំប្លែងខ្លួនអូមីក្រុងជាដើម ។

ទន្ទឹមនោះ ការធ្វើដំណើររបស់ប្រជាជនក្នុងពិធីបុណ្យដ៏សំខាន់បំផុតរបស់ប្រទេសវៀតណាមដែលប្រារព្ធឡើងនៅថ្ងៃទី ៣១ ខែមករានេះ និងដើមខែកុម្ភៈ ត្រូវតែអនុវត្តតាមការបង្ការជំងឺកូវីដ ១៩ ផងដែរ ។ មូលដ្ឋានគួរតែចាត់វិធានការសមស្រប ដោយផ្អែកលើស្ថានភាពជំងឺរាតត្បាត ស្របតាមដំណោះស្រាយរបស់រដ្ឋាភិបាល ក៏ដូចជាការណែនាំប្រកបដោយវិជ្ជាជីវៈរបស់ក្រសួងសុខាភិបាល ។

ស្របពេលជាមួយគ្នានេះ អាជ្ញាធរក្នុងតំបន់មានសិទ្ធិផ្អាកការជួបជុំធំៗដែលមិនចាំបាច់ សកម្មភាព និងពិធីបុណ្យនៅទីតាំងបើកចំហរ ក៏ដូចជារក្សាផលិតកម្មក្នុងលក្ខណៈសុវត្ថិភាពជាដើម ។

បច្ចុប្បន្នវៀតណាមបានកត់ត្រាករណីឆ្លងកូវីដក្នុងមួយថ្ងៃជាមធ្យមច្រើនជាង ១១,០០០ ករណី និងស្លាប់ចំនួន ២០០ នាក់ ខណៈរហូតមកដល់ពេលនេះវៀតណាមបានកត់ត្រាការឆ្លងកូវីដសរុប ២,២៦៣,០៥៣ ដែលជាប់ចំណាត់ថ្នាក់ទី ៣១ ក្នុងចំណោមប្រទេស និងតំបន់ចំនួន ២២៤ ចាប់តាំងពីការចាប់ផ្តើមនៃជំងឺរាតត្បាត ។

ចំណែកចំនួនអ្នកស្លាប់សរុបដោយសារកូវីដនៅក្នុងប្រទេសវៀតណាម រហូតមកដល់ពេលនេះ មានចំនួន ៣៧,៦៦៨ នាក់ ដែលស្មើនឹង ១.៧ ភាគរយនៃចំនួនអ្នកឆ្លងសរុប ខណៈប្រទេសនេះបានកត់ត្រាករណីឆ្លងអូមីក្រុងទាំងនាំចូល និងឆ្លងក្នុងសហគមន៍ដល់ទៅ ១៨៤ ករណី ៕

ប្រែសម្រួលដោយ ៖ ជីវ័ន្ត

ប្រភព ៖ Vietnam Plus

ចុចអាន ៖ ចំណងជើង “គ្មានពេលវេលាណាល្អជាងពេលមកទស្សនាប្រាសាទអង្គរវត្ត” លើសារព័ត៌មាន Bloomberg កំពុងលើកមុខមាត់កម្ពុជា