ផ្ទុះបាតុកម្មក្នុងរាជធានីរបស់កាណាដា នាយករដ្ឋមន្រ្តីរត់ទៅលាក់ខ្លួននៅកន្លែងសម្ងាត់ 

នាយករដ្ឋមន្រ្តីកាណាដាលោក Justin Trudeau និងក្រុមគ្រួសាររបស់គាត់ បានចាកចេញពីផ្ទះនៅក្នុងរាជធានី Ottawa របស់ប្រទេស ទៅកាន់ទីតាំងសម្ងាត់មួយ ស្របពេលដែលអ្នកបើករថយន្តដឹកទំនិញរហូតដល់ទៅ៥០,០០០នាក់ ប្រមូលផ្តុំគ្នាដើម្បីតវ៉ាប្រឆាំងនឹងអាណត្តិវ៉ាក់សាំងនិងវិធានការរឹតត្បិតកូវីដរបស់ប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកបើកបរ បានបើកឡានដឹកទំនិញរបស់ពួកគេចូលទៅក្នុងរាជធានី Ottawa របស់ប្រទេសកាណាដាកាលពីថ្ងៃសៅរ៍ទី២៩ខែមករា ដែលជាផ្នែកមួយនៃចលនា “Freedom Convoy” ដើម្បីប្រឆាំងនឹងតម្រូវការចាក់វ៉ាក់សាំង បើចង់ឆ្លងកាត់ព្រំដែនសហរដ្ឋអាមេរិក។

ដោយមានដោតទង់ជាតិកាណាដា លើកបដាទាមទារសេរីភាព និងស្រែកពាក្យស្លោកប្រឆាំងលោកនាយករដ្ឋមន្រ្តី Justin Trudeau, ឡានដឹកទំនិញទាំងនោះ ត្រូវបានចូលរួមដោយអ្នកតវ៉ារាប់ពាន់នាក់ផ្សេងទៀត ដែលខឹងសម្បាមិនត្រឹមតែដោយសារវិធានការរឹតបន្តឹងកូវីដប៉ុណ្ណោះទេ ប៉ុន្តែក៏ដោយសារការមិនសប្បាយចិត្តជាមួយរដ្ឋាភិបាលផងដែរ។

នៅពេលចូលកាន់តែជិតសភា ក្រុមគ្រួសារបានដើរដង្ហែ ខណៈមនុស្សវ័យក្មេងនាំគ្នាស្រែក ហើយមនុស្សចាស់ បានគោះឆ្នាំង និងខ្ទះដើម្បីតវ៉ានៅខាងក្រៅការិយាល័យរបស់លោក Trudeau។

ប្រព័ន្ធផ្សព្វផ្សាយកាណាដា បានរាយការណ៍ថា លោកនាយករដ្ឋមន្ត្រី និងក្រុមគ្រួសាររបស់គាត់ ត្រូវបាននាំខ្លួនចេញពីផ្ទះ ទៅកាន់ទីតាំងសម្ងាត់មួយនៅក្នុងរាជធានី ដោយសារតែបាតុករភាគច្រើន មានកំហឹងទៅលើលោក Trudeau។

លោក Trudeau បាននិយាយកាលពីថ្ងៃសុក្រថា ទស្សនៈរបស់អ្នកដឹកទំនិញទាំងនោះ គឺបង្កហានិភ័យមិនត្រឹមតែចំពោះខ្លួនពួកគេប៉ុណ្ណោះទេ ប៉ុន្តែក៏ចំពោះជនជាតិកាណាដាផ្សេងទៀតផងដែរ។

គួរបញ្ជាក់ថា គិតត្រឹមពេលនេះ ៨២ភាគរយនៃជនជាតិកាណាដាដែលមានអាយុចាប់ពី៥ឆ្នាំឡើងទៅ គឺបានទទួលវ៉ាក់សាំងការពារជំងឺកូវីដ១៩។ ក្នុងចំណោមមនុស្សពេញវ័យ តួលេខគឺ ៩០ភាគរយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ កាណាដា ក្លាយជាប្រទេសទី២ដែលយល់ព្រមឲ្យប្រើប្រាស់វ៉ាក់សាំងរបស់ក្រុមហ៊ុន Pfizer / BioNTech