កូរ៉េ​ខាង​ជើង ធ្វើ​តេស្ត​មីស៊ីល​​មាន​ឥទ្ធិពល​បំផុត​ ចាប់​តាំង​ពី​ឆ្នាំ ២០១៧ 

ប្រទេសកូរ៉េខាងជើងបានអះអាងនៅថ្ងៃចន្ទទី៣១ខែមករានេះថា ខ្លួនបានបាញ់មីស៊ីលដ៏មានឥទ្ធិពលបំផុតចាប់តាំងពីឆ្នាំ២០១៧មក។

ទីក្រុងព្យុងយ៉ាងបានធ្វើតេស្តអាវុធចំនួន៧ដងក្នុងខែមករានេះ ដែលជាចំនួនច្រើនបំផុតមិនធ្លាប់មានសោះនៅក្នុងខែប្រតិទិន ខណៈខ្លួនគំរាមបន្តបាញ់បង្ហោះអាវុធរយៈចម្ងាយឆ្ងាយ និងនុយក្លេអ៊ែរ ដោយបន្ទោសគោលនយោបាយអរិភាពរបស់សហរដ្ឋអាមេរិក ដែលបង្ខំឲ្យខ្លួនធ្វើបែបនេះ។

ប្រព័ន្ធផ្សព្វផ្សាយរដ្ឋកូរ៉េខាងជើងបានផ្សាយថា ប្រទេសនេះបានបាញ់សាកល្បងមីស៊ីលផ្លោងរយៈចម្ងាយមធ្យមប្រភេទ Hwasong-12 ដែលបាញ់បង្ហោះលើកចុងក្រោយបង្អស់ក្នុងឆ្នាំ២០១៧។ មីស៊ីលប្រភេទនេះ មានកម្លាំងគ្រប់គ្រាន់ដើម្បីវាយប្រហារដល់ទឹកដី Guam របស់សហរដ្ឋអាមេរិក។

ទីភ្នាក់ងារសារព័ត៌មានមជ្ឈិមកូរ៉េ KCNA បានផ្សាយថា ការធ្វើតេស្តនេះ បានបញ្ជាក់ពីភាពត្រឹមត្រូវ សុវត្ថិភាព និងប្រសិទ្ធភាពនៃប្រតិបត្តិការរបស់ប្រព័ន្ធអាវុធប្រភេទ Hwasong 12 ដែលកំពុងផលិត។

KCNA បានបន្តថា ការធ្វើតេស្តនេះ ត្រូវបានធ្វើឡើងក្នុងលក្ខណៈមួយ ដែលធានានូវសន្តិសុខរបស់ប្រទេសជិតខាង។

ប្រព័ន្ធផ្សព្វផ្សាយរដ្ឋបានចេញផ្សាយរូបភាពដែលថតដោយកាមេរ៉ាបំពាក់លើក្បាលគ្រាប់ ពេលដែលវាស្ថិតនៅក្នុងលំហ ហើយរូបភាពផ្សេងទៀត បានបង្ហាញពីមីស៊ីលដែលបាញ់ចេញពីដី។

ទោះបីជាយ៉ាងណាក៏ដោយ មិន​មាន​ការ​លើក​ឡើង​ថា​តើ ​មេដឹកនាំ​គីមជុងអ៊ុន​បាន​ចូលរួម​ក្នុង​ការ​បាញ់​បង្ហោះ​នេះដែរឬ​ក៏អត់​នោះ​ទេ៕

ប្រែសម្រួល៖ Vann Vann

ប្រភព៖ Reuters

ចុចអាន៖ កូរ៉េខាងជើង ត្រៀមសាកល្បងនុយក្លេអ៊ែរ និងមីស៊ីលផ្លោង ICBM ឡើងវិញ ឲ្យ អាមេរិក ភ្លឺភ្នែក