វៀតណាម បង្ហាញរូបសំណាក ឆ្នាំខាល ដូចពិតៗសម្រាប់បុណ្យចូលឆ្នាំថ្មី

រូបសំណាកតុក្កតាខ្លាកម្ពស់ ២.៥ ម៉ែត្រនៅទីក្រុង Dong Ha ខេត្ត Quang Tri របស់វៀតណាមដែលត្រូវបានបង្កើតឡើងដើម្បីស្វាគមន៍ឆ្នាំខាល (ឆ្នាំខ្លា) បានទាក់ទាញចំណាប់អារម្មណ៍របស់សហគមន៍អនឡាញជាច្រើន ដោយសារតែភាពស្រស់ស្អាតដ៏អស្ចារ្យរបស់វា ។

យោងតាមក្រុមហ៊ុន Dong Ha City Urban Environment Co. កាលពីថ្ងៃចន្ទបានឲ្យដឹងថា រូបសំណាកសត្វខ្លារបស់ទីក្រុងដែលត្រូវបានសាងសង់ឡើងដើម្បីជាកិត្តិយសដល់សត្វតំណាងក្នុងឆ្នាំនេះកំពុងត្រូវបានកោតសរសើរចំពោះរូបរាងដ៏ត្រចះត្រចង់ និងសក្តិសមដោយអ្នករស់នៅ និងសហគមន៍អនឡាញ ។

តុក្កតាខ្លាត្រូវបានសាងសង់នៅលើច្រាំងថ្មចោទពីមុខឧទ្យាន Le Duan ទីក្រុង Dong Ha ខេត្ត Quang Tri ដើម្បីបង្កើនរូបរាងធម្មជាតិ និងអស្ចារ្យរបស់វា ហើយមានមនុស្សរាប់ពាន់នាក់បានមកថតរូបខ្លាក្នុងរយៈពេល ២ ថ្ងៃកន្លងមកនេះ ចាប់តាំងពីវត្តមានរបស់វានៅឧទ្យាន Le Duan ។

សត្វខ្លានេះបង្កើតឡើងដោយប្រើសារធាតុ Styrofoam បន្ទាប់មកលាបជាមួយម្សៅម្នាងសិលា ហើយចុងក្រោយត្រូវបានលាបជាមួយនឹងពុកចង្ការ ធ្មេញ និងក្រញ៉ាំជាដើម ដើម្បីបង្កើតរូបរាងឲ្យដូចស្ដែងៗ ។

គួរបញ្ជាក់ថា សិប្បករបានចំណាយពេល ១២ ថ្ងៃដើម្បីបញ្ចប់គម្រោងនេះ ហើយរូបសំណាកនេះតំណាងឲ្យការជូនពរឆ្នាំថ្មី សិរីមង្គល វិបុលសុខគ្រប់ប្រការ ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ វៀតណាម មិនឲ្យបាញ់កាំជ្រួចអបអរបុណ្យចូលឆ្នាំថ្មី