ចិន បិទខ្ទប់សង្កាត់២ទៀតនៅ ប៉េកាំង ខណៈអូឡាំពិក កាន់តែជិតដល់មែនទែន

ទីក្រុងប៉េកាំង បានបិទសង្កាត់ចំនួនពីរបន្ថែមទៀតក្នុងទីក្រុងប៉េកាំង បន្ទាប់ពីករណីកូវីដថ្មីចំនួន២៣ ត្រូវបានរាយការណ៍កាលពីចុងសប្តាហ៍ ដោយដាក់មនុស្សរាប់ពាន់នាក់នៅក្រោមការរឹតត្បិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈនៅសល់ត្រឹមតែបួនថ្ងៃទៀតប៉ុណ្ណោះមុនពេលព្រឹត្តិការណ៍កីឡាអូឡាំពិករដូវរងាចាប់ផ្តើម ក្រុមមន្ត្រីបានដាក់តំបន់ទីពីរ និងទីបីនៃទីក្រុងប៉េកាំង នៅក្រោមការបិទខ្ទប់។

អាជ្ញាធរបានបិទខ្ទប់បរិវេណលំនៅដ្ឋានក្នុងសង្កាត់ Fengtai ដែលមានប្រជាជនប្រមាណ២.២៦លាននាក់ និងតំបន់ Anzhenli ក្នុងសង្កាត់ Chaoyang ដែលមានប្រជាជនប្រមាណ ៦៨,០០០នាក់ ក្នុងរយៈពេលប៉ុន្មានថ្ងៃចុងក្រោយនេះ។

ពលរដ្ឋក្នុងតំបន់ទាំង២ មិនត្រូវបានអនុញ្ញាតឲ្យចាកចេញពីលំនៅដ្ឋានរបស់ពួកគេទេ ហើយនឹងត្រូវធ្វើតេស្តរកកូវីដជារៀងរាល់ថ្ងៃ។

ការបិទខ្ទប់នេះបានកើតឡើងបន្ទាប់ពីមនុស្សចំនួន១.២លាននាក់នៅទីក្រុង Xiong’an ដែលជាតំបន់សេដ្ឋកិច្ចថ្មីមានចម្ងាយ ៩៦គីឡូម៉ែត្រភាគនិរតីទីក្រុងប៉េកាំង ត្រូវបានបញ្ជាឲ្យស្នាក់នៅក្នុងផ្ទះរបស់ពួកគេ ដោយសារផ្ទុះចង្កោមឆ្លងមេរោគកាលពីចុងសប្តាហ៍។

មិនដូចការបិទខ្ទប់ផ្សេងទៀតទេ ការរឹតបន្តឹងថ្មីៗទាំងនេះ មិនមានការប្រកាសជាសាធារណៈឡើយ។

គណៈកម្មការសុខភាពរបស់ទីក្រុងប៉េកាំងបានរាយការណ៍ថា ករណីបង្ហាញរោគសញ្ញាថ្មីចំនួន២៣ករណីដែលបានរាយការណ៍នៅក្នុងរដ្ឋធានីរបស់ប្រទេសចិន​ បានធ្វើឲ្យចំនួនកើនដល់សរុប១០៨ករណីចាប់តាំងពីការផ្ទុះឡើង កាលពីពីរសប្តាហ៍មុន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ប៉េកាំង រកឃើញករណីឆ្លងកូវីដខ្ពស់បំផុត ខណៈអូឡាំពិក នៅមិនដល់មួយសប្តាហ៍ទៀត