នាយករដ្ឋមន្ត្រី អង់គ្លេស ថា បើរុស្ស៊ីហ៊ានវាយអ៊ុយក្រែននឹងក្លាយជា គ្រោះមហន្តរាយ និងសោកនាដកម្ម

នាយករដ្ឋមន្ត្រីអង់គ្លេសលោក Boris Johnson បាននិយាយកាលពីថ្ងៃអង្គារ នៅពេលជួបជាមួយប្រធានាធិបតីអ៊ុយក្រែន Volodymyr Zelenskyy នៅទីក្រុង Kyiv ថា ទាហានរុស្ស៊ីនៅតាមព្រំដែនជាមួយអ៊ុយក្រែនកំពុងបង្កគ្រោះថ្នាក់ច្បាស់លាស់នាពេលបច្ចុប្បន្ននេះ ។

លោក Johnson បានប្រាប់លោក Zelenskyy ថា បើរុស្ស៊ីវាយដណ្ដើមយកទីក្រុង និងទឹកដីរបស់អ៊ុយក្រែនមែននោះ វានឹងក្លាយជាគ្រោះមហន្តរាយនយោបាយ មនុស្សធម៌ និងយោធាសម្រាប់រុស្ស៊ី និងពិភពលោក ។

លោក Johnson បញ្ជាក់ថា រុស្ស៊ី​មិន​ចង់​បាន​ទ័ព​ណាតូ​នៅ​អឺរ៉ុប​ខាង​កើត​នោះទេ ប៉ុន្តែពួកគេបានបង្កើនកងកម្លាំងរបស់ពួកគេនៅតាមព្រំដែនអ៊ុយក្រែនជាមួយនឹងទាហានប្រហែល ១០០ ពាន់នាក់ ។

លោកបាននិយាយថា ការកើនឡើងនេះនឹងក្លាយជា “សោកនាដកម្ម” ។ ទោះយ៉ាងណាក៏ដោយលោកបានចុះហត្ថលេខាលើក្រឹត្យមួយដើម្បីពង្រីកកងកម្លាំងអ៊ុយក្រែនក្នុងរយៈពេល ៣ ឆ្នាំខាងមុខដល់ទាហាន ៣៥០ ពាន់នាក់ ។ លោក​ថា ការ​កើន​ឡើង​នេះ​មិន​មែន​សម្រាប់​សង្គ្រាម​ទេ ប៉ុន្តែ​សម្រាប់​សន្តិភាព​នា​ពេល​អនាគត ។

គួររំឭកថា អង់គ្លេស​បាន​ជួយ​ហ្វឹកហ្វឺន​កងទ័ព​អ៊ុយក្រែន​ ចាប់តាំងពី​ឆ្នាំ ២០១៥ មក ខណៈរហូតមកដល់ពេលនេះពួកគេក៏​បន្ត​ផ្តល់​អាវុធ​ដល់អ៊ុយក្រែនផងដែរ ហើយរដ្ឋាភិបាលរបស់លោក Johnson នឹងផ្តល់ប្រាក់ជាង ១០០ លានដុល្លារបន្ថែមទៀតដើម្បីជួយអ៊ុយក្រែនកាត់បន្ថយការពឹងផ្អែកថាមពលរបស់ខ្លួនលើប្រទេសរុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ពូទីន លែងនៅស្ងៀម ចេញមុខចោទអាមេរិកថា ព្យាយាមទាញរុស្ស៊ីឲ្យធ្លាក់ចូលសង្គ្រាម