ខ្សែភ្លើងដាច់ ធ្លាក់ឆក់មនុស្សស្លាប់ពេញផ្សារនៅ សាធារណរដ្ឋប្រជាធិបតេយ្យកុងហ្គោ

មនុស្សចំនួន២៦នាក់បានស្លាប់ បន្ទាប់ពីពួកគេត្រូវខ្សែភ្លើងឆក់ក្នុងផ្សារមួយ នៅសាធារណរដ្ឋប្រជាធិបតេយ្យកុងហ្គោ។

រឿងដ៏រន្ធត់នេះបានកើតឡើង ពេលដែលខ្សែភ្លើង​តង់ស្យុង​ខ្ពស់​បាន​ធ្លាក់​លើ​ផ្ទះនិង​មនុស្ស ​ដែលកំពុង​ដើរ​ទិញ​ឥវ៉ាន់​នៅស្រុក Matadi-Kibala ជាយក្រុង Kinshasa កាល​ពី​ថ្ងៃ​ពុធទី២ខែកុម្ភៈ ហើយមនុស្សមួយចំនួនបានស្លាប់នៅនឹងកន្លែង។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ជនរងគ្រោះភាគច្រើនគឺជាស្ត្រីអាជីវករផ្សារ។

វីដេអូ​ដែលបង្ហោះ​លើ​បណ្តាញ​សង្គម បានបង្ហាញ​ពីទិដ្ឋភាពក្រោយ​ឧបទ្ទវហេតុ​នេះ ដោយ​គេឃើញ​សាកសពមនុស្ស​ជា​ច្រើន​នាក់ ស្ថិត​នៅ​ក្នុង​​ទឹកដក់បន្ទាប់ពីមានភ្លៀងធ្លាក់។

ទោះបីជាយ៉ាងណាក៏ដោយ គេ​នៅ​មិន​ទាន់​ដឹង​ពី​មូលហេតុ​ដែល​បណ្តាល​ឲ្យ​ខ្សែ​ភ្លើង​ដាច់​នោះ​ទេ។ ប៉ុន្តែនៅក្នុងសេចក្តីថ្លែងការណ៍មួយ ក្រុមហ៊ុនអគ្គិសនីជាតិរបស់សាធារណរដ្ឋប្រជាធិបតេយ្យកុងហ្គោ បាននិយាយថា ខ្លួនជឿថា រន្ទះបាញ់បានបណ្តាលឲ្យខ្សែភ្លើងដាច់ ធ្លាក់មកដី៕

ប្រែសម្រួល៖ Vann Vann

ប្រភព៖ BBC

ចុចអាន៖ បុរស​ម្នាក់​ត្រូវ​ចរន្តអគ្គិសនី​ឆក់ជាប់​នឹងបង្គោល​ភ្លើង​ បង្កការ​ភ្ញាក់ផ្អើល​