អាកាសធាតុ សម្លាប់ប្រជាជនអឺរ៉ុប ១៤២,០០០នាក់ ក្នុងរយៈពេល៤០ឆ្នាំចុងក្រោយ

យោងតាមរបាយការណ៍ថ្មីមួយដែលបានចេញផ្សាយនៅថ្ងៃព្រហស្បតិ៍ទី៣ខែកុម្ភៈនេះ បានឲ្យដឹងថា ព្រឹត្តិការណ៍អាកាសធាតុអាក្រក់ដូចជារលកកម្តៅ និងទឹកជំនន់បានធ្វើឲ្យអឺរ៉ុបខាតបង់ទឹកប្រាក់ជិត៥១០ពាន់លានអឺរ៉ូ និងស្លាប់មនុស្សប្រហែល១៤២,០០០នាក់ ក្នុងរយៈពេល៤០ឆ្នាំចុងក្រោយនេះ។

នៅក្នុងការសិក្សារបស់ខ្លួន ទីភ្នាក់ងារបរិស្ថានអឺរ៉ុប (EEA) បានអំពាវនាវឲ្យបន្តវិធានការសម្របខ្លួនទាំងក្នុងកម្រិតបុគ្គល និងរដ្ឋ។

របាយការណ៍នេះបានបង្ហាញថា ព្រឹត្តិការណ៍ធ្ងន់ធ្ងរមួយចំនួនតូចឬប្រហែល៣ភាគរយនៃចំនួនសរុប គឺទទួលខុសត្រូវចំពោះការខូចខាតផ្នែកហិរញ្ញវត្ថុដែលកើតឡើងពីឆ្នាំ១៩៨០ដល់ឆ្នាំ២០២០។

នៅពេលនិយាយពីការបាត់បង់ជីវិតមនុស្ស, រលកកម្តៅគឺរួមចំណែកដល់ទៅ៩១ភាគរយភាគរយឯណោះ ដោយរលកកម្តៅក្នុងរដូវក្តៅឆ្នាំ២០០៣ បានសម្លាប់មនុស្សប្រហែល៨០,០០០នាក់ទៅហើយ។

នៅទូទាំងពិភពលោក អង្គការឧតុនិយមពិភពលោកប៉ាន់ប្រមាណថា ចំនួនគ្រោះមហន្តរាយទាក់ទងនឹងអាកាសធាតុបានកើនឡើងក្នុងរយៈពេល៥០ឆ្នាំចុងក្រោយ ដែលបណ្តាលឲ្យមានការខូចខាតកាន់តែច្រើន ប៉ុន្តែចំនួនអ្នកស្លាប់មានកាន់តែតិច។

អាល្លឺម៉ង់គឺជាប្រទេសនៅអឺរ៉ុបដែលទទួលរងការខាតបង់ច្រើនជាងគេបំផុត ពោលគឺខាតបង់ទឹកប្រាក់ចំនួន១០៧លានអឺរ៉ូ (១២០លានដុល្លារអាមេរិក) និងជនរងគ្រោះចំនួន៤២,០០០នាក់ក្នុងរយៈពេល៤ទសវត្សរ៍កន្លងមកនេះ។

បន្ទាប់មកគឺប្រទេសបារាំង ដែលខាតបង់ទឹកប្រាក់ចំនួន៩៩ពាន់លានអឺរ៉ូ និងស្លាប់មនុស្ស ២៦,៧០០នាក់ ចំណែកអ៊ីតាលី ខាតបង់៩០ពាន់លានអឺរ៉ូនិងស្លាប់ ២១,៦០០នាក់។

គួរបញ្ជាក់ថា គ្រោះមហន្តរាយដូចជាការរញ្ជួយដី និងបន្ទុះភ្នំភ្លើង មិនត្រូវបានរាប់បញ្ចូលក្នុងតួលេខទាំងនេះទេ ដោយសារវាមិនមែនជាឧតុនិយម៕

ប្រែសម្រួល៖ Vann Vann

ប្រភព៖ CNA