ព័ត៌មានអន្ដរជាតិ

មេដឹកនាំកំពូល ISIS សម្លាប់ខ្លួន និងគ្រួសារពេលអាមេរិកវាយប្រហារនៅស៊ីរី

បានផុស

៣ years មុន

នៅ

ថ្ងៃសុក្រ ៤ កុម្ភៈ ២០២២

ដោយ

កាលពីថ្ងៃព្រហស្បតិ៍ ប្រធានាធិបតីសហរដ្ឋអាមេរិក លោក ចូ បៃដិន បាននិយាយថា មេដឹកនាំក្រុមរដ្ឋឥស្លាមបានស្លាប់នៅពេលរូបគេបានបំផ្ទុះសម្លាប់ខ្លួនឯង និងសមាជិកគ្រួសារកំឡុងពេលកម្លាំងពិសេសអាមេរិកធ្វើការវាយប្រហារនៅស៊ីរី។

ប្រការនេះបានធ្វើឲ្យហមន្តរាយដល់កិច្ចខិតខំប្រឹងប្រែងរបស់ក្រុមជីហាដក្នុងការរៀបចំកម្លាំងប្រយុទ្ធរបស់ខ្លួន បន្ទាប់ពីបានបាត់បង់ដីដ៏ធំ។

បុរសឈ្មោះ Abu Ibrahim al-Hashemi al-Quraishi ជាមេដឹកនាំរដ្ឋឥស្លាម បន្ទាប់ពីស្ថាបនិករបស់ក្រុមនេះឈ្មោះ Abu Bakr al-Baghdadi ត្រូវបានសម្លាប់នៅឆ្នាំ២០១៩កំឡុងពេលការវាយប្រហាររបស់អាមេរិកមួយដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក ចូ បៃដិន និងមន្ត្រីអាមេរិកឲ្យដឹងថា នៅពេលកម្លាំងពិសេសអាមេរិកបានហ៊ុំព័ទ្ធ Quraishi នៅភាគពាយ័ព្យប្រទេសស៊ីរីទាំងយប់ រូបគេបានបំផ្ទុះសម្លាប់ខ្លួនឯង និងសម្លាប់សមាជិកគ្រួសាររបស់ខ្លួនដែលមានស្ត្រី និងកូនថែមទៀតផង។

លោកប្រធានាធិបតីអាមេរិកបាននិយាយក្នុងសេចក្តីថ្លែងការណ៍មួយថា ៖«កាលពីយប់មិញ តាមការបញ្ជារបស់ខ្ញុំ កម្លាំងយោធាពិសេសអាមេរិកនៅភាគពាយ័ព្យប្រទេសស៊ីរីទទួលបានជោគជ័យក្នុងប្រតិបត្តិការបង្ក្រាបភេរវកម្មដើម្បីការពារពលរដ្ឋអាមេរិក និងសម្ព័ន្ធមិត្តរបស់យើង ហើយធ្វើឲ្យពិភពលោកជាកន្លែងសុវត្ថិភាព»។

«ដោយសារតែជំនាញ និងភាពក្លាហានរបស់កម្លាំងប្រដាប់អាវុធរបស់ពួកយើង យើងបានវាយប្រហារសម្លាប់ Abu Ibrahim al-Hashimi al-Qurayshi ជាមេដឹកនាំក្រុម Isis។ ពលរដ្ឋអាមេរិកទាំងអស់បានត្រឡប់មកវិញដោយសុវត្ថិភាពពីប្រតិបត្តិការ»។

មន្ត្រីអាមេរិក និងតំបន់ជឿថា បុរសឈ្មោះ Qurayshi ជាមេដឹកនាំកំពូលម្នាក់ដែលអាមេរិកចង់បានបំផុតដែលបានដឹកនាំការវាយប្រហារដ៏ខ្លាំងក្លាមួយកាលពីខែមុនលើពន្ធនាគារដែលឃុំឃាំងអ្នកទោសរដ្ឋឥស្លាមនៅភាគខាងកើតប្រទេសស៊ីរី។

មុនការសម្លាប់នេះ មន្ទីរបញ្ចកោណបាននិយាយថា កងកម្លាំងពិសេសបានតាមប្រមាញ់ក្រុមជីហានជាន់ខ្ពស់នៅក្នុងការវាយឆ្មក់តាមផ្លូវអាកាសមួយដែលបានសម្លាប់មនុស្ស១៣នាក់ នៅក្នុងប្រតិបត្តិការដ៏ជោគជ័យ។

ការវាយប្រហារទាំងព្រឹកព្រលឹមលើផ្ទះមួយកន្លែងនៅភូមិ Atme ភាគខាងត្បូងព្រំដែនប្រទេសតួកគី បានបំផ្លាញឧទ្ធម្ភាគចក្រអាមេរិកមួយដែលត្រូវបានប្រើដឹកកម្លាំងទ័ពពិសេសពី Erbil ក្នុងប្រទេសអ៊ីរ៉ាក់៕

ប្រែសម្រួល៖ វីរបុត្រ
ប្រភព៖ reuters