ព័ត៌មានអន្ដរជាតិ

លោក គីម ជុងអ៊ុន អបអរការបើកកីឡាអូឡាំពិកនៅចិនថ្ងៃនេះគឺជាជ័យជម្នះដ៏អស្ចារ្យ

បានផុស

៣ years មុន

នៅ

ថ្ងៃសុក្រ ៤ កុម្ភៈ ២០២២

ដោយ

មេដឹកនាំកូរ៉េខាងជើង លោក គីម ជុងអ៊ុន បានផ្ញើលិខិតមួយច្បាប់ទៅកាន់ប្រធានាធិបតីចិន លោក ស៊ី ជីនពីង ដើម្បីអបអរសាទរពិធីបើកព្រឹត្តិការណ៍កីឡាអូឡាំពិករដូវរងា ដោយបានទុកជា«ជ័យជម្នះដ៏អស្ចារ្យ» និងនិយាយថា លោកចង់ឲ្យទំនាក់ទំនងប្រទេសទាំងពីរកាន់តែល្អប្រសើរឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ទីភ្នាក់ងារសារព័ត៌មាន KCNA នៅថ្ងៃសុក្រនេះថា ៖«ជោគជ័យនៃការបើកព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំង ទោះជាមានវិបត្តិសុខភាពទូទាំងពិភពលោក និងស្ថានភាពធ្ងន់ធ្ងរមិនធ្លាប់មានពីមុនគឺជាជ័យជម្នះដ៏អស្ចារ្យមួយទៀតដែលសង្គមនិយមចិនទទួលបាន»។

លោក គីម បានសង្កត់ថា លោកនឹង «អភិវឌ្ឍទំនាក់ទំនងឲ្យរឹងមាំរវាងគណបក្សទាំងពីរ និងប្រទេសទាំងពីរ ឱ្យឈានទៅរកដំណាក់កាលខ្ពស់ថ្មីមួយ»។

ព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំង ប្រទេសចិន នឹងបើកទំព័រប្រវត្តិសាស្ត្រជាផ្លូវការនាថ្ងៃសុក្រ ទី៤ ខែកុម្ភៈនេះ។

ក្រុមប្រឹក្សាសន្តិសុខអង្គការសហប្រជាជាតិនឹងជួបប្រជុំគ្នានៅថ្ងៃនេះដែរដើម្បីពិភាក្សាជុំវិញការបាញ់សាកល្បងមីស៊ីលច្រើនបំផុតជាប់កំណត់ត្រាកាលពីខែមករាកន្លងទៅនេះរបស់កូរ៉េខាងជើង។ ជាពិសេសគឺការបាញ់មីស៊ីលប្លាស្ទិកចម្ងាយឆ្ងាយមិនធ្លាប់មានកាលពីថ្ងៃអាទិត្យ គិតចាប់តាំងឆ្នាំ២០១៧មក។

កាលពីខែមករា ក៏មានលិខិតពីអាជ្ញាធរកីឡាដែរដោយកូរ៉េខាងជើងបាននិយាយថា ខ្លួនមិនអាចចូលរួមការប្រកួតកីឡាមួយនៅប្រទេសចិន ដោយសារវិបត្តិកូវីដ-១៩។

អត្តពលិកកូរ៉េខាងជើងមិនមានសិទ្ធិចូលរួមប្រកួតស្ថិតក្រោមទង់ជាតិរបស់ខ្លួនឡើយ បន្ទាប់ពីប្រទេសនេះត្រូវបានគណៈកម្មាធិការអូឡាំពិកអន្តរជាតិ (IOC) បានព្យួររហូតដល់ដាច់ឆ្នាំ២០២២ ដោយសារមិនបានបញ្ជូនក្រុមអត្តពលិករបស់ខ្លួនទៅចូលរួមប្រកួតកីឡាអូឡាំពិករដូវក្តៅនៅទីក្រុងតូក្យូ ប្រទេសជប៉ុន ឆ្នាំមុន ដោយសារហេតុផលកង្វល់កូវីដ៕

ប្រែសម្រួល៖ វីរបុត្រ
ប្រភព៖ reuters