ពូទីន បិទភ្នែក ពេលអត្តពលិកអ៊ុយក្រែន ហែក្បួនមកដល់មុខ ក្នុងពិធីបើកអូឡាំពិក

លោក វ្ល៉ាឌីមៀរ ពូទីន បានបង្ហាញការព្រងើយកន្តើយដាក់អត្តពលិករបស់ប្រទេសអ៊ុយក្រែន ដោយគាត់ហាក់ដូចជាងងុយដេក នៅពេលពួកគេហែក្បួនមកដល់មុខ អំឡុងពិធីបើកព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំងកាលពីយប់ថ្ងៃសុក្រទី៤ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីដេអូក្នុងទូរទស្សន៍ បានបង្ហាញឲ្យឃើញប្រធានាធិបតីរុស្សីរូបនេះ អង្គុយចាប់ដៃខ្លួនឯងហើយបិទភ្នែកប៉ុន្មានវិនាទីនៅពេលអត្តពលិកអ៊ុយក្រែន ដើរក្បួនចូលកីឡដ្ឋាន Bird’s Nest។

រឿងនេះកើតឡើងចំពេលមានការភ័យខ្លាចថា រុស្ស៊ី អាចវាយប្រហារអ៊ុយក្រែន ហើយបង្កឲ្យមានការប្រឈមមុខដាក់គ្នាដ៏អាក្រក់បំផុតជាមួយលោកខាងលិច ចាប់តាំងពីសង្គ្រាមត្រជាក់មក។

គួរបញ្ជាក់ថា ប្រទេសរុស្ស៊ីក៏មានអត្តពលិកចូលរួមនៅក្នុងព្រឹត្តិការណ៍កីឡានេះផងដែរ ប៉ុន្តែពួកគេត្រូវបានបង្ខំឲ្យប្រកួតប្រជែងក្នុងនាមជា “គណៈកម្មាធិការអូឡាំពិករុស្ស៊ី” ហើយមិនអាចប្រើទង់ជាតិរបស់ប្រទេសនៅលើឯកសណ្ឋានរបស់ពួកគេ ឬបន្លឺភ្លេងជាតិនៅពេលពួកគេឈ្នះបានឡើយ។

លោក ពូទីន ស្ថិតក្នុងចំណោមឥស្សរជនបរទេសមួយចំនួនតូចប៉ុណ្ណោះ ដែលចូលរួមក្នុងព្រឹត្តិការណ៍នេះ បន្ទាប់ពីមេដឹកនាំលោកខាងលិចភាគច្រើន បានធ្វើពហិការជុំវិញកំណត់ត្រាសិទ្ធិមនុស្សរបស់ប្រទេសចិន និងការបៀតបៀនជនមូស្លីម អ៊ុយហ្គ័រ នៅតំបន់ ស៊ីន ជាំង ភាគខាងកើត៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក ពូទីន ទៅដល់ទីក្រុង ប៉េកាំង ហើយដើម្បីជួបលោក ស៊ី