រុស្ស៊ី-ចិន ជំរុញឲ្យ​អាមេរិក ​បោះបង់​គម្រោងដាក់​ពង្រាយមីស៊ីលនៅ​អាស៊ី​ប៉ាស៊ីហ្វិក និង អឺរ៉ុប (មានវីដេអូ)

រុស្ស៊ី និងចិន បានអំពាវនាវឲ្យសហរដ្ឋអាមេរិក បោះបង់ផែនការរបស់ខ្លួន ក្នុងការដាក់ពង្រាយមីស៊ីលរយៈចម្ងាយមធ្យម និងខ្លី នៅក្នុងតំបន់អាស៊ីប៉ាស៊ីហ្វិក និងអឺរ៉ុប។ នេះបើយោងតាមសេចក្តីថ្លែងការណ៍រួមរបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងសមភាគីចិន លោក ស៊ី ជីនពីង ស្តីពីទំនាក់ទំនងអន្តរជាតិឈានចូលយុគសម័យថ្មី និងការអភិវឌ្ឍន៍ប្រកបដោយនិរន្តរភាពជាសកល ដែលបានអនុម័តក្នុងកិច្ចប្រជុំមួយនៅរដ្ឋធានីរបស់ប្រទេសចិន កាលពីថ្ងៃសុក្រទី៤ខែកុម្ភៈ។

សេចក្តីថ្លែងការណ៍នោះបានឲ្យដឹងថា “ភាគីទាំងពីរ បានអំពាវនាវឲ្យសហរដ្ឋអាមេរិកឆ្លើយតបជាវិជ្ជមានចំពោះគំនិតផ្តួចផ្តើមរបស់រុស្ស៊ី ហើយបោះបង់ផែនការរបស់ខ្លួនក្នុងការដាក់ពង្រាយមីស៊ីលរយៈចម្ងាយមធ្យម និងរយៈចម្ងាយខ្លីនៅក្នុងតំបន់អាស៊ីប៉ាស៊ីហ្វិក និងអឺរ៉ុប។ ភាគីទាំងពីរនឹងបន្តរក្សាទំនាក់ទំនង និងពង្រឹងការសម្របសម្រួលលើបញ្ហានេះ”។

សហរដ្ឋអាមេរិកបានផ្អាកការប្តេជ្ញាចិត្តរបស់ខ្លួនក្រោមសន្ធិសញ្ញាកងកម្លាំងនុយក្លេអ៊ែរកម្រិតមធ្យម (INF) កាលពីថ្ងៃទី២ខែកុម្ភៈឆ្នាំ២០១៩ ដោយលើកឡើងពីការរំលោភលើកតិកាសញ្ញានេះពីសំណាក់ប្រទេសរុស្ស៊ី។

ទីក្រុងវ៉ាស៊ីនតោន​បាន​លើក​ឡើងអំពី​ការ​ចោទ​ប្រកាន់​ទាំង​នេះជា​លើក​ដំបូង នៅ​ក្នុង​ខែ​កក្កដា ឆ្នាំ២០១៤។ យោងតាមរដ្ឋបាលអាមេរិកបានឲ្យដឹងថា ប្រទេសរុស្ស៊ីបានបំពានលក្ខខណ្ឌនៃសន្ធិសញ្ញា INF ដោយបង្កើតកាំជ្រួចមីស៊ីល 9M729។

ទោះបីជាយ៉ាងណាក៏ដោយ ទីក្រុងមូស្គូបានច្រានចោលការចោទប្រកាន់ទាំងនេះ ហើយបានវាយបកទៅវិញ ដោយចង្អុលជាពិសេសទៅលើធាតុនៃប្រព័ន្ធការពារមីស៊ីលរបស់អាមេរិកដែលកំពុងដាក់ពង្រាយនៅអឺរ៉ុប។

កាលពីខែកញ្ញាឆ្នាំ២០១៩ លោក ពូទីន បានផ្ញើសំណើទៅកាន់ប្រទេសមួយចំនួន រួមទាំងប្រទេសសមាជិកណាតូផងដែរ ដើម្បីណែនាំឲ្យផ្អាកការដាក់ពង្រាយមីស៊ីលរយៈចម្ងាយមធ្យម និងខ្លីនៅក្នុងទ្វីបអឺរ៉ុប និងតំបន់ផ្សេងទៀត ប៉ុន្តែសហរដ្ឋអាមេរិកបានច្រានចោលគំនិតផ្តួចផ្តើមនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Tass

ចុចអាន៖ លោក ពូទីន ទៅដល់ទីក្រុង ប៉េកាំង ហើយដើម្បីជួបលោក ស៊ី