ស្ថានភាពមិនស្រួល ចិន បិទខ្ទប់ទីក្រុងជាប់ព្រំដែន វៀតណាម (មានវីដេអូ)

ស្របពេលមានកង្វល់កាន់តែខ្លាំង អាជ្ញាធរនៅទីក្រុង Baise ភាគនិរតីប្រទេសចិន បានបញ្ជាឲ្យប្រជាពលរដ្ឋ ស្នាក់នៅក្នុងផ្ទះចាប់ពីថ្ងៃចន្ទទី៧ខែកុម្ភៈនេះទៅ ហើយចៀសវាងការធ្វើដំណើរដែលមិនចាំបាច់ ខណៈពួកគេ អនុវត្តវិធានការទប់ស្កាត់ដ៏តឹងរ៉ឹងបំផុត ដើម្បីប្រយុទ្ធប្រឆាំងនឹងការកើនឡើងនៃករណីឆ្លងកូវីដ ក្នុងសហគមន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះការផ្ទុះកូវីដនៅក្នុងទីក្រុង Baise ដែលមានប្រជាជនប្រហែល៣.៦លាននាក់ និងស្ថិតនៅជាប់ព្រំដែនប្រទេសវៀតណាម មានកម្រិតទាបបើធៀបទៅនឹងប្រទេសនានាលើពិភពលោកក៏ដោយ ប៉ុន្តែការទប់ស្កាត់ រួមទាំងបម្រាមធ្វើដំណើរមិនសំខាន់ចេញនិងចូលផងដែរនោះ គឺត្រូវបានអនុវត្តយ៉ាងខ្ជាប់ខ្ជួនតាមគោលការណ៍ណែនាំជាតិ ដើម្បីទប់ស្កាត់ការរីករាលដាលយ៉ាងឆាប់រហ័ស។ .

កិច្ចខិតខំប្រឹងប្រែងនេះ ត្រូវអនុវត្តជាបន្ទាន់ក្នុងអំឡុងពេលនៃព្រឹត្តិការណ៍កីឡាអូឡាំពិករដូវរងា ដែលចាប់ផ្តើមកាលពីថ្ងៃសុក្រទី៤ខែកុម្ភៈ និងដំណើរការរហូតដល់ថ្ងៃទី២០ខែកុម្ភៈ ក៏ដូចជារដូវកាលធ្វើដំណើរដ៏មមាញឹកសម្រាប់ថ្ងៃឈប់សម្រាកពិធីបុណ្យចូលឆ្នាំចិនផងដែរ។

ទីក្រុង Baise នៅក្នុងតំបន់ Guangxi បានរាយការណ៍ពីការឆ្លងក្នុងសហគមន៍ចំនួន៣៧ករណីកាលពីថ្ងៃអាទិត្យ ពោលគឺកើនឡើងពី៦ករណីនៅថ្ងៃសៅរ៍។ នេះបើយោងតាមទិន្នន័យពីគណៈកម្មការសុខភាពជាតិ។

ទូរទស្សន៍រដ្ឋបានផ្សាយថា ប្រជាពលរដ្ឋត្រូវតែស្នាក់នៅក្នុងផ្ទះ លើកលែងតែការធ្វើដំណើរដើម្បីទិញសម្ភារៈសំខាន់ៗ ឬការធ្វើតេស្តរកកូវីដប៉ុណ្ណោះ ហើយគួរតែជ្រើសរើសការដឹកជញ្ជូនមកដល់ផ្ទះ ជាជាងការទិញក្នុងហាងដោយផ្ទាល់តាមដែលអាចធ្វើទៅបាន។

ទីក្រុងក៏បានផ្អាកអាជីវកម្មដែលមិនសំខាន់ ការដឹកជញ្ជូនសាធារណៈ និងបិទសាលារៀន ហើយពន្យារពេលការបើកច្រកចូលតាមព្រំដែនអន្តរជាតិផងដែរ។ បុគ្គលិកសំខាន់ៗ ចាំបាច់ត្រូវមានលិខិតពិសេសសម្រាប់ធ្វើចលនានៅក្នុងទីក្រុង Baise។

គួរបញ្ជាក់ថា បើបូករួមទាំងទីក្រុង Baise, ប្រទេសចិនបានរាយការណ៍ករណីឆ្លងក្នុងសហគមន៍ចំនួន៤៥ករណីកាលពីថ្ងៃទី៦ខែកុម្ភៈ ពោលគឺកើនឡើងពី១៣ករណីនៅថ្ងៃទី៥ខែកុម្ភៈ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ចិន បិទខ្ទប់សង្កាត់២ទៀតនៅ ប៉េកាំង ខណៈអូឡាំពិក កាន់តែជិតដល់មែនទែន