Putin ព្រមានថា អឺរ៉ុបនឹងធ្លាក់ក្នុងជម្លោះយោធា បើអ៊ុយក្រែន ចូល​ ណាតូ (មានវីដេអូ)

បន្ទាប់ពីជំនួបជាមួយប្រធានាធិបតីបារាំង Emmanuel Macron, ប្រធានាធិបតីរុស្ស៊ី លោក Vladimir Putin បានព្រមានថា ប្រទេសអ៊ឺរ៉ុប នឹងត្រូវបានទាញចូលទៅក្នុងជម្លោះយោធា ប្រសិនបើអ៊ុយក្រែនចូលរួមជាមួយអង្គការណាតូ។

មេដឹកនាំរុស្ស៊ីរូបនេះក៏បានព្រមានផងដែរថា នឹងគ្មានអ្នកឈ្នះឡើយ ពីវិបត្តិដែលកំពុងបន្តនេះ។

មេដឹកនាំទាំងពីរបានជួបប្រជុំគ្នាក្នុងវិមានក្រឹមឡាំង នៃប្រទេសរុស្ស៊ី សម្រាប់កិច្ចពិភាក្សាដែលលោក Putin ពណ៌នាថា មានប្រយោជន៍ និងសំខាន់។

លោក Emmanuel Macron បានធ្វើដំណើរទៅកាន់ទីក្រុងមូស្គូសម្រាប់កិច្ចពិភាក្សា ចំពេលមានការប្រឈមមុខដាក់គ្នាជុំវិញការដាក់ពង្រាយយោធារបស់រុស្ស៊ី នៅជិតព្រំដែនអ៊ុយក្រែន។

បន្ទាប់ពីកិច្ចប្រជុំនេះ លោក Macron បាននិយាយថា លោកប្រាកដណាស់ថា លោកនឹងទទួលបានលទ្ធផលមួយចំនួន បើទោះបីជាលោកមិនហ៊ានធានាក៏ដោយ។

ចំណែកនៅក្នុងសន្និសីទសារព័ត៌មានរួមគ្នាមួយបន្ទាប់ពីកិច្ចពិភាក្សា លោក Putin បាននិយាយថា គំនិតមួយចំនួនរបស់លោក Macron ទាក់ទងនឹងសន្តិសុខគឺមានភាពប្រាកដប្រជា ហើយថា អ្នកទាំងពីរនឹងពិភាក្សាគ្នាម្តងទៀតនៅពេលលោក Macron ធ្វើដំណើរទៅកាន់ទីក្រុង គៀវ ដើម្បីជួបជាមួយថ្នាក់ដឹកនាំអ៊ុយក្រែន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sky

ចុចអាន៖ ចារកម្មអាមេរិក៖ រុស្ស៊ី ប្រើពេលតែ២ថ្ងៃទេវាយអ៊ុយក្រែន ហើយជនស៊ីវិល ៥ម៉ឺននាក់អាចស្លាប់