ព័ត៌មានអន្ដរជាតិ

ជិតមានការសម្រេចសំខាន់ ក្រោយលោក ម៉ាក្រុង ជួបលោក ពូទីន និងបន្តជួបមេដឹកនាំអ៊ុយក្រែនថ្ងៃនេះ

បានផុស

៣ years មុន

នៅ

ថ្ងៃអង្គារ ៨ កុម្ភៈ ២០២២

ដោយ

«ប៉ុន្មានថ្ងៃខាងមុខនឹងមានការសម្រេចចិត្តសំខាន់ជុំវិញការប្រឈមមុខដាក់គ្នានៅអ៊ុយក្រែន» លោកប្រធានាធិបតីបារាំង អេម៉ានុយអែល ម៉ាក្រុង មានប្រសាសន៍បែបនេះ បន្ទាប់ពីកាលពីថ្ងៃចន្ទ លោកបានជួបប្រធានាធិបតីរុស្ស៊ី លោក វ្លាឌីមៀរ ពូទីន ដែលបានលើកឡើងពីការរីកចម្រើនខ្លះក្នុងជំនួបនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន មានប្រសាសន៍ថា នេះជាកិច្ចប្រជុំកំពូលលើកដំបូងនៅទីក្រុងមូស្គូដែលលោកបានជួបមេដឹកនាំប្រទេសលោកខាងលោកលិច ចាប់តាំងពីវិមានក្រឹមឡាំងបានដាក់ពង្រាយកងទ័ពនៅព្រំដែនជាប់អ៊ុយក្រែន ប៉ុន្តែលោកក៏ព្រមានជាថ្មីអំពីការគំរាមកំហែងនៃសង្គ្រាម ប្រសិនបើអ៊ុយក្រែនចូលរួមសម្ព័ន្ធភាពអង្គការណាតូ។

រុស្ស៊ីដែលកំពុងមានឥទ្ធិពលខ្លាំងនៅអឺរ៉ុបក្រោយសង្គ្រាមត្រជាក់ចង់បានការធានាសន្តិសុខដែលរាប់ទាំងការសន្យាមិនដាក់ពង្រាយកងទ័ពមីស៊ីលជិតព្រំដែនរបស់ខ្លួន និងការពង្រីកផ្នែកខាងក្រោយហេដ្ឋារចនាសម្ព័ន្ធយោធារបស់ណាតូ។

ប្រទេសខាងលិចបាននិយាយថា ការទាមទាររបស់រុស្ស៊ីមួយចំនួនមិនមែនជាអ្នកចាប់ផ្តើម ប៉ុន្តែខ្លួនកំពុងមានឆន្ទៈពិភាក្សាអំពីការគ្រប់គ្រងអាវុធ និងជំហានកសាងទំនុកចិត្ត។

លោក ម៉ាក្រុង ដែលបានជំរុញផ្នែកការទូត ស្របពេលលោកផ្តោតលើការបោះឆ្នោតជាថ្មីនៅពីរខែទៀតបានជួបពិភាក្សាជាង៥ម៉ោងរាប់ទាំងអាហារពេលល្ងាចកាលពីថ្ងៃចន្ទជាមួយប្រធានាធិបតីរុស្ស៊ី។

លោក ម៉ាក្រុង បានប្រាប់អ្នកកាសែតក្រោយទទួលទានអាហារថា ៖«ពីរបីថ្ងៃទៀតនឹងមានការសម្រេចចិត្ត ហើយនឹងមានការពិភាក្សាស៊ីជម្រៅដែលយើងនឹងបន្តរួមគ្នាទៀត»។

លោក ពូទីន បានលើកឡើងគំនិតយោបល់មួយចំនួនរបស់លោក ម៉ាក្រុង អាចជួយដោះស្រាយវិបត្តិ។

«គំនិត សំណើរ របស់លោក (ម៉ាក្រុង) មួយចំនួនដែលប្រហែលជាលឿនពេកដើម្បីនិយាយ ខ្ញុំគិតថា វាពិតជាអាចទៅរួចដើម្បីធ្វើជាមូលដ្ឋាននៃជំហានរួមគ្នារបស់ពួកយើងបន្ថែមទៀត»។ លោក ពូទីន បានបន្ថែម។

មេដឹកនាំទាំងពីរនឹងជួបពិភាក្សាគ្នាម្តងទៀត បន្ទាប់ពីលោក ម៉ាក្រុង ជួបមេដឹកនាំអ៊ុយក្រែន ដែលគ្រោងធ្វើនាថ្ងៃអង្គារ៍នេះ។

រុស្ស៊ីដែលបានគ្រប់គ្រងតំបន់ Crimea ពីអ៊ុយក្រែនកាលពីឆ្នាំ២០១៤បានកំពុងគាំទ្រក្រុមបំបែកខ្លួននៅភាគខាងកើតប្រទេស និងបានដាក់ពង្រាយកម្លាំងទ័ពជាង១០ម៉ឺននាក់នៅព្រំដែនជិតអ៊ុយក្រែន។

រុស្ស៊ីបានបញ្ជាក់ថា ខ្លួនគ្មានផែនការធ្វើសកម្មភាពផ្ទុះអាវុធណាមួយឡើយ ប៉ុន្តែអាចមានសកម្មភាពយោធាមិនជាក់លាក់ ប្រសិនបើការទាមទារសន្តិសុខរបស់ខ្លួនមិនបានសម្រេច៕

ប្រែសម្រួល៖ វីរបុត្រ
ប្រភព៖ Reuters