ព័ត៌មានអន្ដរជាតិ

ប្រធានាធិបតីវៀតណាម ង្វៀន សួនហ្វុក ចួលរួមពិធីច្រត់នង្គ័ល

បានផុស

៣ years មុន

នៅ

ថ្ងៃអង្គារ ៨ កុម្ភៈ ២០២២

ដោយ

ប្រធានាធិបតីវៀតណាមលោក ង្វៀន សួនហ្វុក (Nguyen Xuan Phuc) បានចូលរួមជាមួយមន្ត្រី និងអ្នកស្រុកនៅខេត្ត Ha Nam ភាគខាងជើង ក្នុងពិធីបុណ្យប្រពៃណីច្រត់នង្គ័ល ឬភ្ជួររាស់ (Tich Dien) កាលពីថ្ងៃទី ៧ ខែកុម្ភៈ ដើម្បីបួងសួងសុំផលដំណាំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះធ្វើឡើងជារៀងរាល់ឆ្នាំនៅថ្ងៃទី ៧ នៃខែទី ១ តាមច័ន្ទគតិដើម្បីបួងសួងដល់ឆ្នាំនៃការច្រូតកាត់ និងភាពរុងរឿង ។

យោងតាមកំណត់ត្រាប្រវត្តិសាស្ត្រ ពិធីបុណ្យនេះមានតាំងពីឆ្នាំ ៩៨៧ ក្នុងសម័យរាជវង្ស Le នៅពេលដែលស្តេច Le Dai Hanh សម្រេចព្រះហឫទ័យយាងទៅភ្ជួរស្រែនៅឃុំ Doi Son ស្រុក Duy Tien ក្នុងខេត្ត Ha Nam បច្ចុប្បន្ន ដើម្បីជំរុញការដាំដុះស្រូវ ។

ទំនៀមទំលាប់នេះបានក្លាយជាប្រពៃណីប្រចាំឆ្នាំដែលត្រូវបានសង្កេតឃើញតាមរយៈរាជវង្សជាច្រើន មុនពេលកប់បាត់ក្រោមរជ្ជកាលរបស់ស្តេច Khai Dinh នៃរាជវង្សង្វៀន ហើយវាត្រូវបានស្ដារឡើងវិញនៅឆ្នាំ ២០០៩ ។

ចំណែកពិធីដែលប្រារព្ធឡើងក្នុងព្រឹត្តិការណ៍នេះរួមមាន ក្បួនដង្ហែស្គរធំ និងផ្ទាំងអនុស្សាវរីយ៍របស់ស្តេច Le Dai Hanh ។ ក្បួនដង្ហែបន្តទៅកាន់វាលដែលស្ដេចភ្ជួររាស់ ក្រោយមកបន្តពិធីថ្វាយបង្គំព្រះកសិកម្មដើម្បីបួងសួងសុំឲ្យមានរដូវទទួលបានទិន្នផលខ្ពស់ និងសម្បូរសប្បាយ ។

ក្នុងសុន្ទរកថា លោក ង្វៀន សួនហ្វុកបានសង្កត់ធ្ងន់ថា ដោយសារគ្រោះមហន្តរាយធម្មជាតិ និងជំងឺ ជាពិសេសជំងឺកូវីដ ១៩ កាលពីឆ្នាំមុន វិស័យកសិកម្ម និងជនបទបានជួយធានាសន្តិសុខស្បៀង បង្កើតមូលដ្ឋានគ្រឹះសម្រាប់ស្ថិរភាពសង្គម និងរួមចំណែកក្នុងការធ្វើសមាហរណកម្មអន្តរជាតិ ការនាំចេញ និងការលើកកម្ពស់កិត្យានុភាពរបស់វៀតណាមជាដើម ៕