អាមេរិក ជំរុញឲ្យកូរ៉េខាងជើង កុំគិតតែមីស៊ីល គិតប្រជាជនផង

កាលពីថ្ងៃចន្ទទី៧ខែកុម្ភៈ សហរដ្ឋអាមេរិកបានអំពាវនាវឲ្យប្រទេសកូរ៉េខាងជើង កុំយកប្រាក់ទៅផ្គត់ផ្គង់កម្មវិធីនុយក្លេអ៊ែរ និងមីស៊ីលផ្លោងរបស់ខ្លួន ហើយផ្តល់អាទិភាពដល់តម្រូវការរបស់ប្រជាជនខ្លួនវិញ ខណៈរុស្ស៊ី និងចិនបានស្តីបន្ទោសចំពោះការដាក់ទណ្ឌកម្មថា ធ្វើឲ្យស្ថានភាពមនុស្សធម៌កាន់តែអាក្រក់ទៅៗនៅក្នុងរដ្ឋអាស៊ីដ៏សម្ងាត់មួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិបាននិយាយថា “យើងសូមអំពាវនាវឲ្យកូរ៉េខាងជើង បង្ហាញការប្តេជ្ញាចិត្តចំពោះសុខុមាលភាពរបស់ប្រជាជនខ្លួន ដោយការគោរពសិទ្ធិមនុស្ស បញ្ឈប់កម្មវិធីអាវុធប្រល័យលោក និងកម្មវិធីមីស៊ីលផ្លោងខុសច្បាប់របស់ខ្លួន ហើយផ្តល់អាទិភាពដល់តម្រូវការរបស់ប្រជាជន ដែលងាយរងគ្រោះវិញ”។

ប្រទេសកូរ៉េខាងជើង បានស្ថិតនៅក្រោមការដាក់ទណ្ឌកម្មរបស់អង្គការសហប្រជាជាតិ ចាប់តាំងពីឆ្នាំ២០០៦មក ដោយសារកម្មវិធីនុយក្លេអ៊ែរ និងមីស៊ីលផ្លោងរបស់ខ្លួន។

គួរបញ្ជាក់ថា កាលពីខែវិច្ឆិកា រុស្ស៊ី និងចិនបានពិនិត្យឡើងវិញនូវសេចក្តីសម្រេចឆ្នាំ២០១៩ ដើម្បីបន្ធូរបន្ថយទណ្ឌកម្មរបស់អង្គការសហប្រជាជាតិលើកូរ៉េខាងជើង នៅក្នុងអ្វីដែលពួកគេពណ៌នាថា ជាការប៉ុនប៉ងដើម្បីកែលម្អស្ថានភាពមនុស្សធម៌។

ទោះបីជាយ៉ាងណាក៏ដោយ ចំណាត់ការ​នេះ​បាន​ទទួល​ការ​គាំទ្រ​​ឬ​ការ​ចូល​រួមតិចតួចបំផុត ​ក្នុង​ចំណោម​សមាជិក​ក្រុមប្រឹក្សា ដូច្នេះ​ចិន និង​រុស្ស៊ី​មិន​បានដាក់វាឲ្យ​បោះ​ឆ្នោត​ទេ៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េ ខាង ជើង ធ្វើ តេស្ត មីស៊ីល មាន ឥទ្ធិពល បំផុត ចាប់ តាំង ពី ឆ្នាំ ២០១៧