អង់គ្លេស រកឃើញអ្នកឆ្លងមេរោគបណ្តាលឲ្យហូរឈាមតាមប្រដាប់ភេទស្រដៀង អេបូឡា  

ជំងឺគ្រុនក្តៅ Lassa ចំនួនពីរករណី ត្រូវបានរកឃើញនៅប្រទេសអង់គ្លេស ក្នុងចំណោមមនុស្សដែលទើបត្រឡប់មកពីតំបន់ អាហ្វ្រិកខាងលិច។

មន្ត្រី​សុខាភិបាល​បាន​បង្ហាញ​ថា អ្នក​ជំងឺ​គឺ​ជា​សមាជិក​នៃ​គ្រួសារ​តែ​មួយ ​ដែល​រស់​នៅ​ភាគ​ខាង​កើត​ប្រទេស​អង់គ្លេស។ ពួកគេស្ថិតក្នុងចំណោមករណីចំនួន១០ប៉ុណ្ណោះ ដែលត្រូវបានរកឃើញនៅក្នុងប្រទេស។

សាច់ញាតិទីបី ក៏ត្រូវបានគេសង្ស័យថាមានជំងឺស្រដៀង Ebola នេះដែរ ប៉ុន្តែកំពុងរង់ចាំការធ្វើតេស្តបញ្ជាក់។ ជំងឺនេះបានសម្លាប់មនុស្សប្រហែលម្នាក់ក្នុងចំណោម១០០នាក់ ។

ស្របពេលជាមួយគ្នានោះ ទីភ្នាក់ងារសន្តិសុខសុខភាពចក្រភពអង់គ្លេស (UKHSA) បានសង្កត់ធ្ងន់ថា មិនមានភស្តុតាងនៃការឆ្លងជាបន្តបន្ទាប់ក្នុងចំណោមករណីណាមួយនោះទេ។

ជំងឺគ្រុនក្តៅ Lassa គឺជាជំងឺរាតត្បាតនៅក្នុងប្រទេសនីហ្សេរីយ៉ា និងប្រទេសមួយចំនួនទៀត នៅឆ្នេរសមុទ្រភាគខាងលិចទ្វីបអាហ្រ្វិក រួមទាំងប្រទេសលីបេរីយ៉ា និងហ្គីណេផងដែរ។

ជាធម្មតា មនុស្សឆ្លងមេរោគនេះ បន្ទាប់ពីប៉ះពាល់នឹងអាហារ ឬរបស់របរប្រើប្រាស់ក្នុងផ្ទះដែលកខ្វក់ជាមួយនឹងទឹកនោម ឬលាមករបស់សត្វកណ្តុរដែលមានមេរោគ។ ប៉ុន្តែមេរោគនេះអាចធ្វើឲ្យស្ត្រីចេញឈាមតាមទ្វារមាស និងបណ្តាលឲ្យប្រកាច់។

យោងតាមអង្គការសុខភាពពិភពលោក (WHO) បានឲ្យដឹងថា ប្រហែល៨០ភាគរយនៃមនុស្សដែលឆ្លងជំងឺនេះ មិនមានរោគសញ្ញាអ្វីទាំងអស់។

ក្នុង​ចំណោម​អ្នក​ដែល​មាន​រោគ​សញ្ញា អ្នក​ជំងឺ​មួយ​ភាគ​បួន​នឹង​ជួប​ប្រទះ​ ការ​ថ្លង់​បណ្ដោះ​អាសន្ន។ រោគសញ្ញាផ្សេងទៀតរួមមាន ឈឺក្បាល ឈឺបំពង់ក និងក្អួត។ វាក៏អាចបង្កឲ្យមានការហូរឈាមតាមមាត់ និងច្រមុះផងដែរ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ផ្ទុះជំងឺ Lassa​ នៅអាហ្វ្រិក សម្លាប់មនុស្ស ៨០នាក់