វៀតណាម ចាត់ទុក កូវីដ ជាជំងឺធម្មតា និងត្រៀមរស់នៅជាមួយវីរុសនេះ

បើ​តាម​នាយក​មន្ទីរពេទ្យ​សាកលវិទ្យាល័យ​វេជ្ជសាស្ត្រ​ហាណូយលោកវេជ្ជបណ្ឌិត Nguyen Lan Hieu បាននិយាយថា ជាមួយនឹងអត្រាការចាក់វ៉ាក់សាំងខ្ពស់ ឥឡូវនេះវៀតណាមគួរតែត្រៀមខ្លួនរស់នៅក្នុងយុគសម័យកូវីដ ។

លោក Hieu បានប្រាប់សារព័ត៌មាន VNExpress ថា “យើងអាចចាត់ទុកថា កូវីដជាជំងឺទូទៅ និងធម្មតា ដោយសារតែការលេចឡើងនៃវីរុសបំប្លែងខ្លួនអូមីក្រុង ហើយយើងអាចរស់នៅដោយស្ងប់ស្ងាត់ទាំងស្រុងជាមួយកូវីដ និងបើកសកម្មភាពសេដ្ឋកិច្ចសង្គមឡើងវិញ” ។

លោកវេជ្ជបណ្ឌិតនិយាយថា “ខ្ញុំគិតថា វៀតណាមកំពុងដើរលើផ្លូវត្រូវ នៅពេលប្តូរពីគោលនយោបាយ “សូន្យកូវីដ” ទៅជាការឆ្លើយតបដោយសុវត្ថិភាព និងរស់នៅជាមួយកូវីដ ។ សម្រាប់ពេលនេះ យើងគួរតែរង់ចាំមើលពីរបៀបដែលពិភពលោកទាំងមូលឆ្លើយតបចំពោះវីរុសបំប្លែងខ្លួនអូមីក្រុងដើម្បីមើលថាតើយើងអាចប្រកាសពីការបញ្ចប់កូវីដដែរឬទេ” ។

ទោះជាយ៉ាងណាក៏ដោយ វៀតណាមមិនគួររង់ចាំរហូតដល់ពិភពលោកប្រកាសការបញ្ចប់នៃជំងឺរាតត្បាតនោះទេ ប៉ុន្តែត្រូវរៀបចំដើម្បីសម្របខ្លួនទៅនឹងរយៈពេលក្រោយកូវីដ ។

លោក Hieu បាននិយាយថា លោកសង្ឃឹមថា នៅពេលអនាគតនឹងមិនមានការបិទ និងបើកប្រទេសឡើងវិញទៀតទេ ដោយសារតែការរីករាលដាលនៃកូវីដ ១៩ នោះ ។ ការត្រលប់ទៅធម្មតាវិញគឺអាចធ្វើទៅបាន ប្រសិនបើវីរុសបំប្លែងខ្លួនអូមីក្រុងត្រូវបានបង្ហាញថា មិនធ្ងន់ធ្ងរដូច វីរុសបំប្លែងខ្លួនដែលតានោះ” ។

ប៉ុន្តែទោះជាយ៉ាងណាក៏ដោយ លោក​បាន​ស្នើ​ឲ្យ​ប្រជាពលរដ្ឋ​នៅតែបន្ត​ពាក់​ម៉ាស​នៅ​ទីសាធារណៈ និង​លាងដៃ​ជាប្រចាំ និងបានជំរុញ​អាជ្ញាធរ​ពន្លឿនការ​ចាក់​វ៉ាក់សាំង និង​ពិនិត្យ​ករណី​មនុស្ស​ចាស់​ទាំងអស់​ដែល​មិនទាន់បានចាក់​ ៕

ប្រែសម្រួលដោយ ៖ ជីវ័ន្ត

ប្រភព ៖ VNExpress

ចុចអាន ៖ ស្អែកនេះ អ្នកទៅលេង វៀតណាម នឹងលែងរឹតបន្តឹងដូចមុនហើយ