លោក Biden និង Johnson និយាយថា នៅតែមានសង្ឃឹមសម្រាប់កិច្ចព្រមព្រៀងការទូត ចំពោះវិបត្តិ រុស្ស៊ី-អ៊ុយក្រែន

មេដឹកនាំសហរដ្ឋអាមេរិក និងចក្រភពអង់គ្លេសបាននិយាយថា មិនមែនក្តីសង្ឃឹមទាំងអស់ត្រូវរលាយសម្រាប់ដំណោះស្រាយការទូតចំពោះវិបត្តិអ៊ុយក្រែននោះទេ ប៉ុន្តែព្រមានថា ស្ថានភាពនៅតែផុយស្រួយ។

នៅក្នុងការហៅទូរសព្ទរយៈពេល៤០នាទី លោក Joe Biden និង Boris Johnson បានយល់ស្របថា កិច្ចព្រមព្រៀងនៅតែអាចធ្វើទៅបាន។

ប្រទេសជាច្រើនបានជំរុញឲ្យពលរដ្ឋរបស់ពួកគេ ចាកចេញពីអ៊ុយក្រែន ហើយសហរដ្ឋអាមេរិកបាននិយាយថា ការទម្លាក់គ្រាប់បែកអាចចាប់ផ្តើម គ្រប់ពេលទាំងអស់។

ប៉ុន្តែនៅក្នុងការសន្ទនារបស់មេដឹកនាំទាំង២ ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីអង់គ្លេស Boris Johnson បាននិយាយថា នៅតែមានឱកាសសំខាន់ សម្រាប់ផ្នែកការទូត។ នេះបើយោងតាមសេចក្តីថ្លែងការណ៍របស់វិមាន Downing Street។

សេចក្តីថ្លែងការណ៍បានឲ្យដឹងថា “លោក​នាយក​រដ្ឋមន្ត្រី Johnson និង​លោក​ប្រធានាធិបតី Biden បាន​ធ្វើ​បច្ចុប្បន្នភាព​គ្នា​ទៅ​វិញ​ទៅ​មក ​លើ​ការ​ពិភាក្សា​ថ្មីៗ​របស់​ពួកគេ​ជាមួយ​មេដឹកនាំ​ពិភពលោក​រួម​គ្នា​។ ពួកគេបានយល់ស្របថា នៅតែមានឱកាសដ៏សំខាន់សម្រាប់ផ្នែកការទូត និងសម្រាប់រុស្ស៊ី ក្នុងការដើរថយក្រោយពីការគំរាមកំហែងរបស់ខ្លួនចំពោះអ៊ុយក្រែន”។

សេចក្តីថ្លែងការណ៍បានបន្ថែមថា “មេដឹកនាំទាំង២ បានសង្កត់ធ្ងន់ថា ការវាយប្រហារណាមួយចូលទៅក្នុងប្រទេសអ៊ុយក្រែន នឹងបណ្តាលឲ្យមានវិបត្តិអូសបន្លាយសម្រាប់ប្រទេសរុស្ស៊ី ជាមួយនឹងការខូចខាតយ៉ាងធំធេងសម្រាប់ទាំងរុស្ស៊ីនិងពិភពលោក”។

តាមសេចក្តីរាយការណ៍លោក Johnson បាននិយាយថា ចក្រភពអង់គ្លេសបានត្រៀមខ្លួនធ្វើអ្វីៗគ្រប់យ៉ាងដើម្បីជួយ។ លោក Johnson ត្រូវបានគេរំពឹងថា នឹងរៀបចំកិច្ចប្រជុំ Cobra នៅថ្ងៃអង្គារនេះដើម្បីពិភាក្សាអំពីការឆ្លើយតបរបស់ចក្រភពអង់គ្លេសចំពោះសម្ពាធ៕

ប្រែសម្រួល៖ Vann Vann

ប្រភព៖ BBC

ចុចអាន៖ អ៊ុយក្រែន អាចមិនចូល ណាតូ ដើម្បីបញ្ចៀសសង្គ្រាម