ហុងកុងនឹងទទួលបានវ៉ាក់សាំងកូវីដពីក្រុមហ៊ុន Sinovac និង Pfizer-BioNTech នៅត្រីមាសទីមួយឆ្នាំក្រោយ

មេដឹកនាំទីក្រុងហុងកុងលោកស្រី Carrie Lam បាននិយាយនៅថ្ងៃសុក្រ ទី១១ ខែធ្នូ នេះថា ទីក្រុងហុងកុងបានបញ្ជាទិញវ៉ាក់សាំងកូវីដ ១៩ ចំនួន ១៥ លានដូសពីក្រុមហ៊ុនឱសថ Sinovac Biotech របស់ចិន និងក្រុមហ៊ុន Pfizer-BioNTech សម្រាប់ចាក់ដល់ប្រជាជនរបស់ខ្លួន ។

វ៉ាក់សាំងដំបូងចំនួន ១ លានដូសនឹងមកដល់ពីប្រទេសចិននៅខែមករា ខណៈមួយលានដូសទៀតពីក្រុមហ៊ុន Pfizer-BioNTech គ្រោងនឹងធ្វើឡើងនៅត្រីមាសទី ១ ឆ្នាំក្រោយ ។ ក្រោយមកទៀតរំពឹងថានឹងមកដល់នៅពាក់កណ្តាលនៃឆ្នាំក្រោយ ។

ទន្ទឹមនោះរដ្ឋាភិបាលមានគោលបំណងទិញវ៉ាក់សាំងសរុបចំនួន ៣០ លានដូស ខណៈមនុស្សម្នាក់ៗត្រូវការចាក់ចំនួន ២ ដង ហើយកំពុងពិភាក្សាទិញវ៉ាក់សាំងពីក្រុមហ៊ុនអង់គ្លេស Oxford-AstraZeneca ផងដែរ ។

លោកស្រី Lam បាននិយាយថា អាទិភាពនៃការចាក់វ៉ាក់សាំងនឹងត្រូវបានផ្តល់ដល់មនុស្សវ័យចំណាស់ និងក្រុមងាយរងគ្រោះដទៃទៀត ។

គួរបញ្ជាក់ថា ក្រុងហុងកុងមានករណីឆ្លងជំងឺកូវីដ ១៩ ចំនួន ៧,៣០០ ករណី និងមានអ្នកស្លាប់ចំនួន ១១៤ នាក់ចាប់តាំងពីរោគរាតត្បាតកើតឡើងកាលពីខែមករា ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS