លោក Trudeau ប្រកាសបង្កកគណនីធនាគារ អ្នកពាក់ព័ន្ធបាតុកម្ម ប្រឆាំងអាណត្តិវ៉ាក់សាំង

នាយករដ្ឋមន្ត្រីកាណាដាលោក Justin Trudeau បានចាត់វិធានការមិនធ្លាប់មានពីមុនមក ដោយលោកបានយកច្បាប់គ្រាអាសន្នមកប្រើ ដើម្បីបង្ក្រាបបាតុកម្មប្រឆាំងអាណត្តិវ៉ាក់សាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ លោក Trudeau និយាយថា វិសាលភាពនៃវិធានការនេះនឹងមាន ពេលវេលាកំណត់, សមហេតុផល និងសមាមាត្រ ហើយនឹងមិនដាក់ពង្រាយកងទ័ពឡើយ។

ដោយមិនចាំបាច់មានដីកាតុលាការ, ធនាគារនឹងអាចបង្កកគណនីផ្ទាល់ខ្លួនរបស់អ្នកណាក៏ដោយ ដែលពាក់ព័ន្ធជាមួយនឹងការតវ៉ា។

កាលពីថ្ងៃអាទិត្យ មន្ត្រីអនុវត្តច្បាប់បានបណ្តេញក្រុមអ្នកតវ៉ាប្រឆាំងអាណត្តិ នៅឯស្ពាន Ambassador ក្នុងទីក្រុង Windsor ដែលជាផ្លូវដ៏សំខាន់សម្រាប់ពាណិជ្ជកម្មកាណាដា-សហរដ្ឋអាមេរិក បន្ទាប់ពីជាប់គាំងអស់រយៈពេលមួយសប្តាហ៍។

បាតុកម្មបានចាប់ផ្តើមជាការប្រមូលផ្តុំគ្នា ប្រឆាំងនឹងច្បាប់ថ្មីដែលតម្រូវឲ្យអ្នកដឹកទំនិញទាំងអស់ត្រូវតែចាក់វ៉ាក់សាំងដើម្បីឆ្លងកាត់ព្រំដែនសហរដ្ឋអាមេរិក-កាណាដា ឬត្រូវធ្វើចត្តាឡីស័កនៅពេលត្រឡប់មកវិញ។ ប៉ុន្តែវាបានក្លាយទៅជាការជំទាស់ចំពោះវិធានការរឹតបន្តឹងកូវីដទាំងអស់។

លោក Trudeau បានប្រាប់សន្និសីទសារព័ត៌មានកាលពីថ្ងៃចន្ទទី១៤ខែកុម្ភៈថា “នេះគឺដើម្បីរក្សាប្រជាជនកាណាដាឲ្យមានសុវត្ថិភាព ការពារការងាររបស់មនុស្ស”។ លោក​បន្ថែម​ថា ប៉ូលិស​នឹង​ត្រូវ​បាន​ផ្តល់ ឧបករណ៍​បន្ថែម​ទៀត ដើម្បី​ដាក់​គុក ឬ​ផាក​ពិន័យ​អ្នក​តវ៉ា និង​ការពារ​ហេដ្ឋារចនាសម្ព័ន្ធ​សំខាន់ៗ។

គួរបញ្ជាក់ថា វិធានការដាក់ច្បាប់​គ្រាអាសន្ន​​របស់​លោក Trudeau បានកើតឡើងស្រប​នៅ​ពេល​បាតុកម្ម​នៅ​ទូទាំង​ប្រទេស​កាណាដា​ឈាន​ចូល​ដល់​សប្តាហ៍​ទី​បី​៕

ប្រែសម្រួល៖ Vann Vann

ប្រភព៖ BBC

ចុចអាន៖ ទីក្រុងអូតាវ៉ា ប្រកាសអាសន្ន (មានវីដេអូ)