កុមារីវៀតណាមអាយុ៣ឆ្នាំ ត្រូវឪពុកចុងបង្ខំឲ្យលេបវីស ផឹកថ្នាំសម្លាប់សត្វល្អិត និងដំដែកគោលចូលក្បាល

កុមារីអាយុ៣ឆ្នាំម្នាក់មកពីសង្កាត់ Thach That ទីក្រុងហាណូយ ប្រទេសវៀតណាម នៅតែមិនទាន់ដឹងខ្លួន រយៈពេលជិតមួយខែហើយ បន្ទាប់ពីក្មេងស្រីរូបនេះត្រូវបានបញ្ជូនទៅមន្ទីរពេទ្យ ដោយមានដែកគោលចំនួនប្រាំបួនដើម នៅក្នុងលលាដ៍ក្បាលរបស់នាង។

វេជ្ជបណ្ឌិត Tran Lien Huong នាយករងនៃមន្ទីរពេទ្យ Saint Paul General ដែលមានមូលដ្ឋាននៅទីក្រុងហាណូយ បានប្រាប់កាសែត Tuoi Tre កាលពីថ្ងៃចន្ទទី១៤ខែកុម្ភៈថា បុគ្គលិកពេទ្យនៅនាយកដ្ឋានសង្គ្រោះបន្ទាន់ផ្នែកកុមារ នៅតែប្រឹងប្រែងយ៉ាងខ្លាំងមក្នុងការព្យាបាលក្មេងស្រី។

លោកវេជ្ជបណ្ឌិត Huong និយាយថា “ការឆ្លើយតបរបស់អ្នកជំងឺចំពោះការព្យាបាលគឺមិនល្អឡើយ។ ​បច្ចុប្បន្ន ក្មេង​ស្រី​នៅតែ​សន្លប់ ខណៈស្ថានភាព​របស់​នាងគឺ​មិន​ល្អ​សោះ”​។

ក្មេងស្រីដែលគេហៅឈ្មោះកាត់ថា A. ​ត្រូវ​បាន​​បញ្ជូន​មក​មន្ទីរពេទ្យ Thach That ដំបូង​ក្នុង​សភាព​សន្លប់​ស្តូកស្តឹងនៅ​រសៀល​ថ្ងៃ​ទី​១៧ខែមករា។

ការស្កេន X-ray លើក្បាលរបស់នាង ក្រោយមកបានបង្ហាញពីវត្ថុចំនួន៩ដែលមើលទៅដូចជាដែកគោលនៅក្នុងលលាដ៍ក្បាល។

ដោយសារតែស្ថានភាពអ្នកជំងឺមានសភាពធ្ងន់ធ្ងរ អមដោយសញ្ញាមិនប្រក្រតីផងនោះ មន្ទីរពេទ្យបានបញ្ជូនក្មេងស្រីទៅកាន់មន្ទីរពេទ្យ Saint Paul General ហើយរាយការណ៍រឿងនេះទៅប៉ូលិស។

បន្ទាប់មក ប៉ូលិសនៅទីក្រុងហាណូយបានចាប់ខ្លួន និងចាប់ផ្តើមដំណើរការផ្លូវច្បាប់លើលោក Nguyen Trung Huyen អាយុ៣០ឆ្នាំជាប្តីចុងរបស់ម្តាយ A. ដោយចោទប្រកាន់ពីបទឃាតកម្មនៅថ្ងៃទី២០ខែមករា។

ប៉ូលិសបានបញ្ជាក់ថា លោក Huyen បានធ្វើបាប A. យ៉ាងសាហាវឃោរឃៅដោយបំបាក់ដៃ បង្ខំឲ្យលេបវីស ផឹកថ្នាំសម្លាប់សត្វល្អិត និងដំដែកគោលនៅលើក្បាល៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ចម្លើយសារភាពច្បាស់ៗរបស់ម្តាយចុង ធ្វើទារុណកម្មក្មេងស្រីវៀតណាម ដល់ស្លាប់