រុស្ស៊ី ឲ្យ អាមេរិក ឈប់បញ្ឆេះកំហឹងយោធា ហើយដោះស្រាយជម្លោះផ្ទៃក្នុង អ៊ុយក្រែន

ស្ថានទូតរុស្ស៊ីប្រចាំនៅសហរដ្ឋអាមេរិកបានអំពាវនាវឲ្យទីក្រុងវ៉ាស៊ីនតោនផ្តោតលើដំណោះស្រាយការទូតនៃជម្លោះផ្ទៃក្នុងអ៊ុយក្រែនជាជាងការបញ្ឆេះ “កំហឹងយោធា” ជុំវិញសកម្មភាពយោធារបស់រុស្ស៊ីមកលើអ៊ុយក្រែន ។

វាកើតឡើងជាការឆ្លើយតបទៅនឹងសេចក្តីថ្លែងការណ៍ដែលធ្វើឡើងដោយអ្នកនាំពាក្យក្រសួងការបរទេសលោក Ned Price ដែលក្នុងនោះលោកបានអះអាងថា អាមេរិកមានការព្រួយបារម្ភចំពោះការលុកលុយរបស់រុស្ស៊ីទៅលើអ៊ុយក្រែន ដែលរហូតមកដល់ពេលនេះហាក់ដូចជាមិនបានថយចុះនោះទេ និងបានចោទប្រកាន់រុស្ស៊ីពីបទដាក់ពង្រាយទាហាន ៧,០០០ នាក់បន្ថែមទៀតនៅជិតព្រំដែនរបស់ខ្លួនជាមួយអ៊ុយក្រែន ។

ស្ថានទូតបានសរសេរនៅលើទំព័រ Facebook របស់ខ្លួនថា “យើងជំរុញឲ្យក្រសួងការបរទេសសហរដ្ឋអាមេរិកបញ្ឈប់ការបញ្ឆេះកំហឹងយោធានិយមរបស់អ្នកកាសែត ហើយផ្តោតលើបញ្ហាសំខាន់ៗនៃការដោះស្រាយការទូតនៃជម្លោះផ្ទៃក្នុងអ៊ុយក្រែន” ។

ក្នុងរយៈពេលប៉ុន្មានខែកន្លងមកនេះ ប្រទេសលោកខាងលិច និងអ៊ុយក្រែនបានចោទប្រកាន់រុស្សីពីការបង្កើតកងទ័ពនៅជិតព្រំដែនអ៊ុយក្រែនសម្រាប់រៀបចំសកម្មភាពយោធាណាមួយមកលើរដ្ឋជាអតីតសហភាពសូវៀតមួយនេះ ។

ប៉ុន្តែទីក្រុងមូស្គូបានបដិសេធការចោទប្រកាន់ទាំងនេះ ដោយបញ្ជាក់ម្តងហើយម្តងទៀតថា ខ្លួនមិនគំរាមកំហែងដល់នរណាម្នាក់ឡើយ ហើយក្នុងពេលជាមួយគ្នានេះ បានបង្ហាញការព្រួយបារម្ភយ៉ាងខ្លាំងចំពោះសកម្មភាពយោធារបស់អង្គការណាតូនៅជិតព្រំដែនរុស្ស៊ី ដែលរុស្ស៊ីចាត់ទុកថាជាការគំរាមកំហែងដល់សន្តិសុខជាតិរបស់ខ្លួន ខណៈទីក្រុងមូស្គូក៏បាននិយាយផងដែរថា រុស្ស៊ីមានសិទ្ធិចល័តកងទ័ពនៅក្នុងទឹកដីជាតិរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី​បន្ថែម​កងទ័ព ៧ពាន់​នាក់​ទៀតទៅ​ជិត​ព្រំដែន​អ៊ុយក្រែន ផ្ទុយពីការអះអាងរបស់ ពូទីន