ថៃ ត្រៀមជម្លៀសពលរដ្ឋខ្លួនចេញពី អ៊ុយក្រែន

តាមសេចក្តីរាយការណ៍នៅថ្ងៃសុក្រទី១៨ខែកុម្ភៈនេះ ស្ថានទូតថៃប្រចាំប្រទេសប៉ូឡូញ បានដាក់ចេញនូវផែនការជម្លៀសប្រជាជនថៃ ដែលរស់នៅក្នុងប្រទេសអ៊ុយក្រែន ក្នុងករណីភាពតានតឹងជាមួយរុស្ស៊ីកាន់តែឡើងកម្តៅ។

អ្នកនាំពាក្យក្រសួងការបរទេសថៃ លោក Tanee Sangrat បាននិយាយថា រាជរដ្ឋាភិបាលថៃ មានការព្រួយបារម្ភអំពីសុវត្ថិភាពរបស់ជនជាតិថៃចំនួន ២៣០នាក់ ដែលរស់នៅក្នុងប្រទេសអ៊ុយក្រែន។

ស្ថានទូតបានបង្កើតខ្សែទូរសព្ទពិសេសមួយ ដើម្បីទំនាក់ទំនងឆាប់រហ័ស ក៏ដូចជាបានស្នើសុំកិច្ចសហប្រតិបត្តិការពីរដ្ឋាភិបាលនៃប្រទេសអ៊ុយក្រែន និងប៉ូឡូញ ដើម្បីជម្លៀសប្រជាជនថៃក្នុងករណីមានស្ថានភាពអាសន្នផងដែរ។

កាល​ពី​ថ្ងៃ​អាទិត្យ ស្ថានទូត​បាន​ចេញ​ការ​ព្រមាន​ដល់​ប្រជាជន​ថៃ​ ដោយ​ប្រាប់​ពួកគេ​ឲ្យ​ឈប់​ធ្វើ​ដំណើរ​ទៅប្រទេស​អ៊ុយក្រែន។

យោងតាមលោក Chetthaphan Maksamphan ឯកអគ្គរាជទូតថៃប្រចាំប្រទេសប៉ូឡូញ បានឲ្យដឹងថា ទីក្រុង Lviv ភាគខាងលិចប្រទេសអ៊ុយក្រែន អាចត្រូវបានប្រើប្រាស់ជាផ្លូវជម្លៀសទៅកាន់ប្រទេសប៉ូឡូញសម្រាប់ជនជាតិថៃ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ស្ថានភាពកាន់តែក្ដៅ រុស្ស៊ី បណ្ដេញទូតរង អាមេរិក ចេញពីទីក្រុងមូស្គូ