តុលាការឥណ្ឌា កាត់ទោសប្រហារជីវិតមនុស្ស៣៨នាក់ ពាក់ព័ន្ធការបំផ្ទុះគ្រាប់បែកដ៏សាហាវ

តុលាការឥណ្ឌាកាលពីថ្ងៃសុក្រទី១៨ខែកុម្ភៈ បានកាត់ទោសប្រហារជីវិតបុរសមូស្លីមចំនួន៣៨នាក់ និងដាក់គុកអស់មួយជីវិតចំពោះមនុស្ស ១១នាក់ផ្សេងទៀត ពាក់ព័ន្ធការបំផ្ទុះគ្រាប់បែកបណ្តាក់គ្នាក្នុងឆ្នាំ២០០៨នៅទីក្រុង Ahmedabad ដែលបានសម្លាប់មនុស្សជាង៥០នាក់។

ការផ្ទុះនោះបានរញ្ជួយរដ្ឋ Gujarat ភាគខាងលិច ជាកន្លែងដែលកុបកម្មហិណ្ឌូ-មូស្លីមក្នុងឆ្នាំ ២០០២ បានសម្លាប់មនុស្សរាប់ពាន់នាក់ ភាគច្រើនជាជនមូស្លីម។

ក្រុមមួយដែលមានឈ្មោះថា “ឥណ្ឌាមូចាហ៊ីឌីន” បានអះអាងទទួលខុសត្រូវចំពោះការបំផ្ទុះនៅថ្ងៃទី២៦ខែកក្កដាឆ្នាំ២០០៨។

ចៅក្រម A.R. Patel បានបញ្ជាឲ្យដាក់ទោសនេះ បន្ទាប់ពីអយ្យការបានជំរុញឲ្យមានការកាត់ទោសប្រហារជីវិត ដោយពណ៌នាឧប្បត្តិហេតុនោះថាជា ករណីកម្របំផុតសម្លាប់ជីវិតអ្នកគ្មានកំហុស។

ទោះបីជាយ៉ាងណាក៏ដោយ មេធាវី​ការពារ​ក្តី​បាន​និយាយ​ថា ពួកគេ​នឹង​ប្តឹង​ឧទ្ធរណ៍​ចំពោះ​សាលក្រម​នៅ​តុលាការ​ជាន់​ខ្ពស់​៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ តើបទល្មើសអ្វីខ្លះដែល វៀតណាម កាត់ទោសប្រហារជីវិត?