ឈ្លោះគ្នារឿង ពូទីន, អ្នកកាសែត និងអ្នកនយោបាយអ៊ុយក្រែន វាយគ្នាផ្អើលទូរទស្សន៍ ពេលកំពុងផ្សាយផ្ទាល់ 

អ្នកកាសែតម្នាក់ បានដាល់អ្នកនយោបាយគាំទ្ររុស្ស៊ី នៅចំពោះមុខអតីតនាយករដ្ឋមន្ត្រីអំឡុងការផ្សាយផ្ទាល់តាមទូរទស្សន៍នៅប្រទេសអ៊ុយក្រែន ក្នុងការជជែកដេញដោលអំពីប្រធានាធិបតីរុស្ស៊ីលោក វ្លាឌីមៀរ ពូទីន។

ជម្លោះដ៏គួរឲ្យភ្ញាក់ផ្អើលនេះ បានផ្ទុះឡើងរវាងសមាជិកសភា Nestor Shufrych មកពីគណបក្សប្រឆាំង Opposition Platform – For Life ដែលគាំទ្ររុស្ស៊ីនិងអ្នកកាសែត Yuriy Butusov។

អ្នកនយោបាយត្រូវបានវាយប្រហារ បន្ទាប់ពីគាត់បដិសេធថ្កោលទោសលោក វ្ល៉ាឌីមៀរ ពូទីន ខណៈដែលកងទ័ពរុស្ស៊ីប្រមូលផ្តុំនៅតាមព្រំដែនអាចត្រៀមធ្វើប្រតិបត្តិការណាមួយ។

លោក Shufrych មានហូរឈាមបន្ទាប់ពី Butusov ដើរមករកគាត់ហើយវាយគាត់ចំមុខ ខណៈអតីតនាយករដ្ឋមន្ត្រី Arseniy Yatsenyuk និងអតីតប្រធានាធិបតី Petro Poroshenko អង្គុយមើល។

លោក Shufrych បានក្រោកឡើងដើម្បីតដៃ ហើយអ្នកទាំងពីរបានដួលទៅលើឆាក មុនពេលមានការចូលអន្តរាគមន៍។ អ្នកទាំងពីរបានបំបែកគ្នា ហើយបន្តការពិភាក្សាក្នុងកម្មវិធី “សេរីភាពនៃការបញ្ចេញមតិ” របស់ Savik Shuster។

Shufrych ត្រូវ​បាន​គេ​សួរ​ថា​តើ លោក​ពូទីន​ជា​ឃាតក និង​ជា​ឧក្រិដ្ឋជន​មែន​ឬ​ទេ ប៉ុន្តែ​គាត់​មិន​ឆ្លើយ ហើយនិយាយ​ថា “សូម​ឲ្យ​អាជ្ញាធរ​អ៊ុយក្រែន​ដោះស្រាយ​រឿង​នោះចុះ”។

ស្របពេលជាមួយគ្នានោះ អតីតប្រធានាធិបតី Poroshenko បានរិះគន់គាត់ចំពោះការលើកឡើងនេះ ដោយនិយាយថា “មានភ្នាក់ងាររុស្ស៊ីនៅក្នុងស្ទូឌីយោ”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ចូ បៃដិន ជឿជាក់ថា រុស្ស៊ី សម្រេចចិត្តវាយប្រហារអ៊ុយក្រែនហើយ