អូមីក្រុងបំបាំងកាយ នឹងជំរុញការឆ្លងកូវីដនៅថៃ កើនដល់ ១០ម៉ឺនករណី ក្នុងមួយថ្ងៃ

អ្នកជំនាញខាងមេរោគឈានមុខម្នាក់របស់ប្រទេសថៃបាននិយាយថា ការឆ្លងកូវីដប្រចាំថ្ងៃក្នុងប្រទេស អាចឈានដល់១០០,០០០ករណី។

លោកវេជ្ជបណ្ឌិត Yong Poovorawan មកពីមជ្ឈមណ្ឌលឧត្តមភាពផ្នែករោគវិទ្យា នៃសាកលវិទ្យាល័យ ជូឡាឡុងកន បានឲ្យដឹងថា ការរីករាលដាលយ៉ាងឆាប់រហ័សវីរុសក្លាយពូជ អូមីក្រុងបំបាំងកាយ BA.2 បានធ្វើឲ្យការឆ្លងប្រចាំថ្ងៃឈានដល់១៥ ០០០ករណីនៅសិង្ហបុរី ដែលជាប្រទេសមានប្រជាជន មួយភាគដប់បើធៀបនឹងប្រទេសថៃ។

ប្រសិនបើមានការរីករាលដាលតាមលំនាំស្រដៀងគ្នានៅទីនេះ នោះប្រទេសថៃអាចមានការឆ្លង១០០ ០០០ករណីក្នុងមួយថ្ងៃ នាពេលឆាប់ៗ។

លោកបន្តថា ការឆ្លងនៅក្នុងប្រទេសថៃនឹងឈានដល់កម្រិតកំពូល មុនពេលធ្លាក់ចុះមកវិញ ដូចដែលបានឃើញនៅក្នុងប្រទេសមួយចំនួននៅអឺរ៉ុប និងសហរដ្ឋអាមេរិក។ ដោយសារករណីប្រចាំថ្ងៃនឹងបន្តកើនឡើងនាពេលនេះ លោកបានប្រាប់អ្នកគ្រប់គ្នាឲ្យប្រឹងប្រែងអស់ពីសមត្ថភាព ដើម្បីកាត់បន្ថយហានិភ័យនៃការឆ្លងវីរុសនេះ។

អ្នកដែលធ្វើតេស្តវិជ្ជមាន គួរតែមានការបញ្ជាក់ដោយម៉ាស៊ីន PCR ហើយបន្ទាប់មកធ្វើចត្តាឡីស័កនៅផ្ទះ ឬនៅកន្លែងដាច់ដោយឡែកពីគេក្នុងសហគមន៍៕

ប្រែសម្រួល៖ Vann Vann

ប្រភព៖ Thaiger

ចុចអាន៖ អូមីក្រុងបំបាំងកាយ ដែលកំពុងអុកឡុកប្រទេសថៃ ជាវីរុសបំប្លែងខ្លួនគ្រោះថ្នាក់