ព័ត៌មានអន្ដរជាតិ

លោក គីម និយាយថា បង្កើនសម័្ពន្ធភាពជាមួយចិនធ្វើឲ្យការគំរាមរបស់អាមេរិកខកចិត្ត

បានផុស

៣ years មុន

នៅ

ថ្ងៃអង្គារ ២២ កុម្ភៈ ២០២២

ដោយ

មេដឹកនាំកូរ៉េខាងជើង លោក គីម ជុងអ៊ុន បានប្តេជ្ញាបង្កើនកិច្ចសហប្រតិបត្តិការជាមួយប្រទេសចិន និងរួមគ្នាធ្វើឲ្យខកចិត្តចំពោះគោលនយោបាយគំរាមកំហែង និងអរិភាពពីសហរដ្ឋអាមេរិក និងសម្ព័ន្ធមិត្តរបស់ខ្លួន។

ទីភ្នាក់ងារសារព័ត៌មានរដ្ឋ KCNA បានផ្សាយសង្ខេបនាថ្ងៃអង្គារ៍ ទី២២ ខែកុម្ភៈថា លោក គីម បានធ្វើការកត់សំគាល់នៅក្នុងសារទៅកាន់លោកប្រធានាធិបតីចិន ស៊ី ជីនពីង ដោយបានធ្វើការអបអរសាទរចំពោះមេដឹកនាំចិនពីការបញ្ចប់ព្រឹត្តិការណ៍កីឡាអូឡាំពិករដូវរងាដោយជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គីម មានប្រសាសន៍ថា កូរ៉េខាងជើង និងចិន បានកំពុងការពារ និងជំរុញលើកកម្ពស់សង្គមនិយម ខណៈពេលធ្វើឲ្យមានការខកចិត្តចំពោះគោលនយោបាយអរិភាព និងគំរាមកំហែងយោធារបស់អាមេរិក និងសម្ព័ន្ធមិត្តរបស់ខ្លួនតាមរយៈការពង្រឹងកិច្ចសហប្រតិបត្តិការយុទ្ធសាស្ត្រ និងសាមគ្គីភាព។

ប្រមុខមេដឹកនាំកូរ៉េខាងជើងបានកោតសរសើរចំពោះព្រឹត្តិការណ៍កីឡាអូឡាំពិកថាជាការបង្កើតប្រវត្តិសាស្ត្រ និងបាននិយាយថា ស្ថិតក្រោមការដឹកនាំរបស់លោក ស៊ី ប្រទេសចិនបានពុះពារបញ្ហាប្រឈមគឺ«វិបត្តិសុខភាពធ្ងន់ធ្ងរដែលមិនធ្លាប់មានពីមុនមក និងការបង្ខិតបង្ខំរបស់កងកម្លាំងអរិភាព»។

សូមបញ្ជាក់ថា ព្រឹត្តិការណ៍កីឡាអូឡាំពិករដូវរងាប៉េកាំងបានបញ្ចប់កាលពីថ្ងៃអាទិត្យកន្លងទៅនេះ ហើយកូរ៉េខាងជើងមិនបានបញ្ជូនអត្តពលិកទៅចូលរួមប្រកួតទេ។ លិខិតកន្លងមកពីអាជ្ញាធរកីឡា កូរ៉េខាងជើងបានបន្ទោសកម្លាំងអរិភាព និងហានិភ័យកូវីដ-១៩ដែលធ្វើឲ្យខ្លួនមិនអាចបញ្ជូនទៅចូលរួម៕

ប្រែសម្រួល៖ វីរបុត្រ
ប្រភព៖ Reuters