ព័ត៌មានអន្ដរជាតិ

អង់គ្លេស លែងឲ្យអ្នកឆ្លង កូវីដ នៅដាច់ដោយឡែកទៀតហើយ

បានផុស

៣ years មុន

នៅ

ថ្ងៃអង្គារ ២២ កុម្ភៈ ២០២២

ដោយ

ការរឹតត្បិតទាំងអស់ពាក់ព័ន្ធនឹងជំងឺកូវីដ ១៩ នឹងបញ្ចប់នៅក្នុងប្រទេសអង់គ្លេសនៅថ្ងៃព្រហស្បតិ៍ខាងមុខនេះ ហើយការធ្វើតេស្តទ្រង់ទ្រាយធំដោយឥតគិតថ្លៃនឹងបញ្ឈប់ដូចគ្នា ចាប់ពីថ្ងៃទី ១ ខែមេសាតទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនាយករដ្ឋមន្ត្រី Boris Johnson បានប្រាប់សមាជិកសភាថា កាតព្វកិច្ចផ្លូវច្បាប់នៃការដាក់ឲ្យនៅដាច់ដោយឡែកសម្រាប់អ្នកដែលធ្វើតេស្តវិជ្ជមាននឹងត្រូវបញ្ចប់ ស្របពេលដែលលោកបានបង្ហាញផែនការ “រស់នៅជាមួយកូវីដ” ។

ថ្លែងនៅក្នុងសន្និសីទសារព័ត៌មាន Downing Street កាលពីល្ងាចថ្ងៃចន្ទលោក Johnson បាននិយាយថា ចាប់ពីថ្ងៃទី ១ ខែមេសា ការធ្វើតេស្តដោយឥតគិតថ្លៃនឹងត្រូវបានកំណត់គោលដៅទៅអ្នកដែលងាយរងគ្រោះបំផុតប៉ុណ្ណោះ ។

លោកបាននិយាយថា បច្ចុប្បន្នប្រទេសនេះបានឆ្លងផុតកំពូលនៃវីរុសបំប្លែងខ្លួនអូមីក្រុង ក្រោយករណីឆ្លង និងការចូលសម្រាកព្យាបាលមន្ទីរពេទ្យរបស់អ្នកជំងឺបានធ្លាក់ចុះ ហើយប្រទេសនេះអាចផ្លាស់ប្តូរត្រឡប់ទៅរកភាពប្រក្រតីវិញ ប៉ុន្តែនៅតែរក្សាស្ថានភាពអាសន្នដើម្បីឆ្លើយតបនឹងការរីករាលដាលនៃកូវីដ ឬវីរុសបំប្លែងខ្លួនថ្មីជាដើម ។

ចំណែកប្រធានផ្នែកវេជ្ជសាស្រ្តរបស់ប្រទេសអង់គ្លេសលោកសាស្រ្តាចារ្យ Chris Whitty បាននិយាយថា ការបញ្ចប់ការរឹតត្បិតនេះគឺជា “ការផ្លាស់ប្តូរបន្តិចម្តងៗ និងស្ថិរភាពប្រទេសក្នុងរយៈពេលដ៏សមស្របមួយ” ។

លោកបានអះអាងថា វាជារឿងសំខាន់ដែលប្រទេសជាតិរក្សាបាននូវប្រព័ន្ធតាមដានមេរោគដើម្បីតាមដានការគំរាមកំហែងថ្មីៗ និងសមត្ថភាពក្នុងការបង្កើនវិធានការយ៉ាងឆាប់រហ័សម្តងទៀតដើម្បីការពារអ្នកងាយរងគ្រោះ ៕

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ គួរត្បាល់ច្រមុះ ឬបំពង់ ក ងាយរកឃើញ អូមីក្រុង?