Joe Biden ដាក់ពង្រាយទាហាន និងយន្តហោះចម្បាំង F-35 ទៅអឺរ៉ុប ខណៈស្ថានការណ៍ឡើងកម្តៅ

សេចក្តីប្រកាសកាលពីថ្ងៃអង្គារទី២២ខែកុម្ភៈ របស់ប្រធានាធិបតីអាមេរិកលោក Joe Biden អំពីការដាក់ពង្រាយកងទ័ពឡើងវិញនៅទ្វីបអឺរ៉ុប គឺរួមមានទាំងការបញ្ជូនទាហានថ្មើរជើងចំនួន ៨០០ នាក់ទៅកាន់តំបន់បាល់ទិក និងយន្តហោះចម្បាំង F-35 រហូតដល់ទៅ ៨ គ្រឿងទៅកាន់ទីតាំងប្រតិបត្តិការជាច្រើននៅតាមបណ្តោយផ្នែកខាងកើតរបស់អង្គការណាតូផងដែរ។

លើសពីនេះ សហរដ្ឋអាមេរិកនឹងបញ្ជូនឧទ្ធម្ភាគចក្រវាយប្រហារធុន AH-64 Apache ចំនួន៣២គ្រឿងទៅកាន់តំបន់បាល់ទិក និងទៅកាន់ប្រទេសប៉ូឡូញ ចេញពីទីតាំងនានាក្នុងទ្វីបអឺរ៉ុប។

មន្ត្រីជាន់ខ្ពស់មួយរូបក្នុងក្រសួងការពារជាតិបាននិយាយថា “កម្លាំងបន្ថែមទាំងនេះ កំពុងត្រូវបានបន្លាស់ទីតាំង ដើម្បីធានាដល់សម្ព័ន្ធមិត្តណាតូរបស់យើង ទប់ស្កាត់ការវាយប្រហារដែលអាចកើតមានប្រឆាំងនឹងរដ្ឋសមាជិកណាតូ និងហ្វឹកហាត់ជាមួយកងកម្លាំងប្រទេសជាម្ចាស់ផ្ទះ”។

សេចក្តីប្រកាសនេះធ្វើឡើងបន្ទាប់ពី លោក Joe Biden ជួបជាមួយរដ្ឋមន្ត្រីការបរទេសអ៊ុយក្រែន Dmytro Kuleba ដើម្បីបញ្ជាក់ឡើងវិញនូវការប្តេជ្ញាចិត្តរបស់សហរដ្ឋអាមេរិកចំពោះអធិបតេយ្យភាព និងបូរណភាពទឹកដីរបស់អ៊ុយក្រែន។

សេតវិមាននិយាយថា លោក Biden បានធ្វើបច្ចុប្បន្នភាពដល់លោក Kuleba ស្តីអំពីការឆ្លើយតបរបស់សហរដ្ឋអាមេរិក ចំពោះការសម្រេចចិត្តរបស់រុស្ស៊ីក្នុងការទទួលស្គាល់ឯករាជ្យភាព តំបន់ Donetsk និង Luhansk ដែលកាន់កាប់ដោយក្រុមឧទ្ទាម។

នេះ​រួម​បញ្ចូល​ទាំង​ទណ្ឌកម្ម​ថ្មី​ដែល​បាន​ប្រកាស​កាលពីថ្ងៃអង្គារ និង​ការ​សន្យា​បន្ត​ជំនួយ​ផ្នែក​សន្តិសុខ និង​​សេដ្ឋកិច្ច​ដល់​អ៊ុយក្រែនផងដែរ៕

ប្រែសម្រួល៖ Vann Vann

ប្រភព៖ Reuters

ចុចអាន៖ វីដេអូ កងទ័ពនិងរថពាសដែករុស្ស៊ី ទាំងជួរៗ ចូលទៅ អ៊ុយក្រែន តាមបញ្ជា ពូទីន