វៀតណាម ប្រាប់វិធីសាស្ត្រទប់ស្កាត់ប្រេងសាំងឡើងថ្លៃ

អ្នក​ជំនាញ​វៀតណាមនិយាយ​ថា ការ​កាត់​បន្ថយ​ពន្ធ​ និង​ថ្លៃ​សាំង និង​ការ​ពិចារណា​ឡើង​វិញ​លើ​ការ​ប្រើ​ប្រាស់​មូលនិធិ​រក្សា​ស្ថិរភាព​តម្លៃ​ អាច​ជួយ “បញ្ចុះ​តម្លៃ” ការ​ឡើង​ថ្លៃ​ប្រេងឥន្ធនៈ ​ចំពេល​មាន​ការ​ខ្វះខាត ។

លោក Can Van Luc ប្រធានសេដ្ឋវិទូនៃក្រុមហ៊ុនផ្តល់ប្រាក់កម្ចី BIDV របស់រដ្ឋបាននិយាយថា រដ្ឋាភិបាលអាចកាត់បន្ថយពន្ធលើការប្រើប្រាស់ពិសេសលើប្រេងសាំងក្នុងរយៈពេលខ្លី ដើម្បីកាត់បន្ថយតម្លៃលក់រាយ ដូចដែលប្រទេសមួយចំនួនបានធ្វើ ។ លោក​បន្ត​ថា ជា​ឧទាហរណ៍ ប្រទេស​ថៃ​បាន​កាត់​បន្ថយ​ពន្ធ​លើ​ការ​ប្រើ​ប្រាស់​ពិសេស​លើ​ប្រេង​ម៉ាស៊ូត​ពាក់​កណ្តាល ​រយៈ​ពេល​ ៣ ​ខែ ។

ចំណែកសេដ្ឋវិទូម្នាក់ទៀតគឺលោក Ngo Tri Long អតីតអនុប្រធានវិទ្យាស្ថានស្រាវជ្រាវទីផ្សារ និងតម្លៃក្រោមក្រសួងហិរញ្ញវត្ថុបានស្នើឲ្យកាត់បន្ថយពន្ធបរិស្ថានដើម្បីជួយសម្រួលដល់តម្លៃសាំង ។

សំណើនេះកំពុងត្រូវបានធ្វើឡើង ខណៈដែលប្រទេសវៀតណាមកាលពីថ្ងៃចន្ទបានបង្កើនតម្លៃប្រេងសាំងដល់កម្រិតកំពូលថ្មីមួយ ចំពេលមានការខ្វះខាតការផ្គត់ផ្គង់ដែលត្រូវបានរាយការណ៍ដោយស្ថានីយ៍ជាច្រើន ជាពិសេសនៅភាគខាងត្បូងប្រទេស ។

ពន្ធ និងថ្លៃសេវាមានចំនួនប្រហែល ៤២ ភាគរយនៃតម្លៃសាំងនៅក្នុងប្រទេសវៀតណាម រួមទាំងពន្ធប្រើប្រាស់ពិសេស ពន្ធនាំចូល ពន្ធបរិស្ថាន និងពន្ធលើតម្លៃបន្ថែមជាដើម ។

បើយោងតាមក្រសួងហិរញ្ញវត្ថុបានឲ្យដឹងថា ទោះជាយ៉ាងនេះក្តី សមាមាត្រគឺទាបជាងមធ្យមភាគ បើប្រៀបធៀបជាមួយប្រទេសផ្សេងទៀត ដែលវាមាន ៤៥ ទៅ ៦០ ភាគរយ ៕

ប្រែសម្រួលដោយ ៖ ជីវ័ន្ត

ប្រភព ៖ VNExpress

ចុចអាន ៖ តម្លៃថ្នាំកូវីដ Molnupiravir នៅ វៀតណាម សមល្មមសម្រាប់ទិញប្រើប្រាស់ (មានវីដេអូ)