Breaking News! ស្លាប់ និងរបួសរាប់រយនាក់ បន្ទាប់ពី រុស្ស៊ី បាញ់មីស៊ីល ដ៏សាហាវទៅ អ៊ុយក្រែន (មានវីដេអូ)

ដោយដកស្រង់ប្រភពពីក្រសួងមហាផ្ទៃអ៊ុយក្រែន, សារព័ត៌មាន CNN បានរាយការណ៍ថា មានអ្នកស្លាប់ និងរបួសរាប់រយនាក់នៅទូទាំងប្រទេសអ៊ុយក្រែន បន្ទាប់ពីមានការបាញ់មីស៊ីលដ៏សាហាវជាបន្តបន្ទាប់ពីសំណាក់ប្រទេសរុស្ស៊ី ។

ការផ្ទុះត្រូវបានគេឃើញនៅក្នុងទីក្រុងនានាទូទាំងប្រទេសអ៊ុយក្រែនរួមទាំងរដ្ឋធានី Kyiv បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសថា “ប្រតិបត្តិការយោធាពិសេស” កំពុងដំណើរការនៅក្នុងតំបន់ ។

របាយការណ៍ដែលចេញមកពីប្រទេសអ៊ុយក្រែនឥឡូវនេះបង្ហាញថា មីស៊ីលដែលមានល្បឿនលឿនជាងសំឡេងកំពុងត្រូវបានប្រើប្រាស់ដោយរុស្ស៊ីដើម្បីវាយប្រហារគោលដៅសំខាន់ៗ ។

ទន្ទឹមនោះ ទាហានរុស្ស៊ីក៏បានដាក់មូលដ្ឋាននៅទីក្រុង Mariupol ហើយត្រូវបានគេរាយការណ៍ថាកំពុងឆ្ពោះទៅកាន់ទីក្រុង Kharkov ដែលជាទីក្រុងធំទីពីររបស់ប្រទេសអ៊ុយក្រែន ។

ស្របពេលជាមួយគ្នានេះ ការផ្ទុះត្រូវបានគេឮនៅទូទាំងប្រទេសអ៊ុយក្រែនត្រឹមតែប៉ុន្មាននាទីប៉ុណ្ណោះ បន្ទាប់ពីលោក ពូទីន បានបញ្ចប់សុន្ទរកថាតាមទូរទស្សន៍នៅព្រឹកថ្ងៃព្រហស្បតិ៍នេះ ។

មួយសន្ទុះក្រោយមក វីដេអូបានលេចចេញនៅលើប្រព័ន្ធផ្សព្វផ្សាយសង្គមបង្ហាញពីទីក្រុងកំពង់ផែ Mariupol របស់ប្រទេសអ៊ុយក្រែន ដែលស្ថិតនៅចម្ងាយ ៤៨ គីឡូម៉ែត្រពីព្រំដែនជាមួយប្រទេសរុស្ស៊ីបង្ហាញពីផ្សែងហុយឡើង បន្ទាប់ពីការផ្ទុះជាច្រើនដង ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Daily Star

ចុចអាន ៖ ពូទីន ប្រកាសសង្គ្រាម ពេលនេះមានការផ្ទុះហើយនៅក្នុងប្រទេស អ៊ុយក្រែន