ចិន​ មិនហៅការវាយប្រហាររបស់​ រុស្ស៊ី​ ថាជាការ «​ឈ្លានពាន​» ទេ

ប្រទេសចិន បានច្រានចោលការហៅប្រតិបត្តិការ​យោធារបស់ រុស្ស៊ី ទៅលើ អ៊ុយក្រែន ថាជា “ការឈ្លានពាន” ហើយបានជំរុញឱ្យភាគីទាំងអស់ព្យាយាមអត់ធ្មត់ ទោះបីជាបានណែនាំពលរដ្ឋរបស់ខ្លួនដែលស្នាក់នៅ អ៊ុយក្រែន ឱ្យសំងំក្នុងផ្ទះ ឬមានការប្រុងប្រយ័ត្នចំពោះការបង្ហាញទង់ជាតិចិនក៏ដោយ។

លោកស្រី Hua Chunying អ្នកនាំពាក្យក្រសួងការបរទេសចិន បាននិយាយនៅក្នុងសន្និសីទសារព័ត៌មានមួយ នៅថ្ងៃព្រហស្បតិ៍នេះថា “ប្រទេសចិនកំពុងតាមដាននូវស្ថានភាពចុងក្រោយបង្អស់រវាងប្រទេសទាំងពីរ។ យើងអំពាវនាវឱ្យភាគីទាំងអស់អនុវត្តការអត់ធ្មត់ ដើម្បីការពារស្ថានការណ៍កុំឱ្យចេញពីការគ្រប់គ្រង។”

នៅឯសន្និសីទសារព័ត៌មាន ក្នុងរដ្ឋធានីប៉េកាំង អ្នកនាំពាក្យរូបនេះ បានថ្លែងអំពីសកម្មភាពរបស់រុស្ស៊ី ដោយបដិសេធហៅសកម្មភាពយោធាថាជា “ការឈ្លានពាន” និងបានជំនួសដោយពាក្យថា “ប្រកាន់ពូជសាសន៍” វិញ។

ជាមួយគ្នានោះ អ្នកកាសែត បានចោទសួរលោកស្រីអំពីទំនាក់ទំនងរបស់ចិន និងមេដឹកនាំរុស្ស៊ី រួមទាំងអ៊ុយក្រែនផងដែរ។ លោកស្រី Hua Chunying ឆ្លើយថា ចិន ខុសគ្នានឹងពួកបស្ចិមប្រទេស ហើយខ្លួនមិនផ្ដល់ជំនួយយោធាទៅរុស្ស៊ីទេ ​ខណៈអ៊ុយក្រែនក៏មិនលូកដៃចូលដែរ ព្រោះចិននឹងមិនប្រញាប់ប្រញាល់កាត់សេចក្ដីឱ្យខាងណាមួយឡើយ។ ក្នុងនោះ ចិន មានគោលការណ៍នយោបាយការបរទេសដែលមិនជ្រៀតជ្រែកប្រទេសដទៃ ទាំងងងឹតងងុលនោះទេ។

ឆ្លើយតបនឹងការសកម្មភាពរុស្ស៊ីទៅលើអ៊ុនក្រែន ដែលបណ្ដាញសារព័ត៌មានជាច្រើនតែងហៅថា “ការឈ្លានពាន” លោកស្រី Hua Chunying មានប្រសាសន៍ថា “និយមន័យនៃការឈ្លានពាន ខ្ញុំគិតថាយើងគួរតែត្រឡប់ទៅមើលស្ថានភាពបច្ចុប្បន្ននៅអ៊ុយក្រែន។ បញ្ហាអ៊ុយក្រែនមានប្រវត្តិសាស្រ្ដដ៏ស្មុគស្មាញផ្សេងទៀតដែលបានបន្តរហូតមកដល់សព្វថ្ងៃនេះ ។”

លោកស្រីបន្ថែមថា គ្មាននរណាចង់ឃើញស្ថានភាពបច្ចុប្បន្ននេះទេ។ ចំណែកទង្វើរបស់អាមេរិក គឺជាការបន្ថែមប្រេងទៅលើភ្លើង ដែលនាំឱ្យស្ថានភាពកាន់ក្ដៅឡើង៕

ប្រែសម្រួល៖ សន្យា

ប្រភព៖ CNA

ចុចអាន៖ ប្រធានាធិបតី អ៊ុយក្រែន ប្រកាសឱ្យប្រជាជនចូលបម្រើទ័ព

ចុចអាន៖ ១០រឿង​សង្ខេប​ខ្លី​​​ពី​សង្គ្រាម​កំពុង​ផ្ទុះ​នៅ​អ៊ុយក្រែន