ប្រធានាធិបតីអ៊ុយក្រែន បញ្ជា កែនទ័ព និងហាមមនុស្សប្រុសអាយុ ១៨ដល់៦០ឆ្នាំ មិនឲ្យចេញពីប្រទេស (មានវីដេអូ)

ប្រធានាធិបតីអ៊ុយក្រែនលោក Volodymyr Zelensky បានបញ្ជាឲ្យមានការកែនទ័ពក្នុងទ្រង់ទ្រាយធំ។

នៅក្នុងសេចក្តីប្រកាសមួយ ដែលចុះហត្ថលេខាកាលពីល្ងាចថ្ងៃព្រហស្បតិ៍ទី២៤ខែកុម្ភៈ លោក Zelensky និយាយថា “ដើម្បីធានាការការពាររដ្ឋ រក្សាការត្រៀមខ្លួនប្រយុទ្ធ និងការចល័តកងកម្លាំងប្រដាប់អាវុធអ៊ុយក្រែន និងទម្រង់យោធាផ្សេងទៀត ការកែនទ័ពដែលមានមូលដ្ឋានទូលំទូលាយត្រូវបានបញ្ជា រួមទាំងនៅក្នុងរដ្ឋធានី គៀវ និងទីក្រុងធំៗទាំងអស់របស់អ៊ុយក្រែនផងដែរ”។

សេចក្តី​ប្រកាស​នោះ​​បន្ត​ថា “​ការ​កែន​ត្រូវ​អនុវត្ត​ក្នុង​រយៈពេល៩០ថ្ងៃ​ គិត​ចាប់​ពី​ថ្ងៃ​ចូល​ជា​ធរមាន​នៃ​អនុក្រឹត្យ​នេះ។ សេវា​សន្តិសុខ​អ៊ុយក្រែន ត្រូវ​ចាត់​វិធានការ​ប្រឆាំង​នឹង​ចារកម្ម ​ក្នុង​អំឡុង​ពេលនៃ​ការកែន​ទ័ព​ទូទៅ”។

អនុក្រឹត្យបានបញ្ជាឲ្យមានការចុះឈ្មោះទាហាន ទាហានបម្រុង បញ្ជូនពួកគេទៅអង្គភាពយោធា និងស្ថាប័ននៃកងកម្លាំងប្រដាប់អាវុធអ៊ុយក្រែន និងសេវាកម្មសន្តិសុខរដ្ឋផ្សេងទៀត។

ជាមួយគ្នានេះ អ៊ុយក្រែនបានហាមឃាត់ពលរដ្ឋជាប្រុសទាំងអស់ដែលមានអាយុពី១៨ ទៅ៦០ឆ្នាំមិនឲ្យចាកចេញពីប្រទេស។

សេចក្តីថ្លែងការណ៍បាននិយាយថា បន្ទាប់ពីការដាក់ចេញនូវច្បាប់អាជ្ញាសឹកក្នុងប្រទេសអ៊ុយក្រែន ការរឹតបន្តឹងបណ្តោះអាសន្នត្រូវបានដាក់។

ជាពិសេស ច្បាប់នេះ បានហាមឃាត់សម្រាប់បុរសដែលមានអាយុពី ១៨ដល់៦០ឆ្នាំជាពលរដ្ឋអ៊ុយក្រែន មិនឲ្យចាកចេញពីព្រំដែននៃប្រទេសអ៊ុយក្រែនជាដាច់ខាត។ បទប្បញ្ញត្តិនេះនឹងនៅតែជាធរមានដរាបណាច្បាប់អាជ្ញាសឹក នៅតែមានសុពលភាព៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNN

ចុចអាន៖ ប្រធានាធិបតីអ៊ុយក្រែន៖ ខ្ញុំជាគោលដៅទី១ រីឯគ្រួសារជាគោលដៅទី២ របស់សត្រូវ