ពេលនេះកងកម្លាំងរបស់លោក ពូទីន វាយលុកឆ្ពោះទៅទីក្រុង គៀវ ហើយ

មន្ត្រីការពារជាតិជាន់ខ្ពស់អាមេរិកម្នាក់បានព្រមានថា ពេលនេះកងកម្លាំងរុស្ស៊ីកំពុងវាយលុកឆ្ពោះទៅកាន់ទីក្រុងគៀវ ចំពេលមានការប្រយុទ្ធគ្នានៅអាកាសយានដ្ឋាន Hostomel នៅខាងក្រៅរដ្ឋធានី ។

ទន្ទឹមនោះវាក៏កើតឡើង បន្ទាប់ពីការបាត់បង់ទីក្រុងនុយក្លេអ៊ែរ Chernobyl ចម្ងាយ ១០០ គីឡូម៉ែត្រពីភាគខាងជើងប្រទេសអ៊ុយក្រែនទៅលើកងកម្លាំងរបស់លោក វ្ល៉ាឌីមៀ ពូទីន កាលពីល្ងាចថ្ងៃព្រហស្បតិ៍ ។

ចំណែកយោធាអ៊ុយក្រែនបាននិយាយថា រុស្ស៊ីបានចល័តកងវរសេនាតូចជាង ៦០ អង្គភាពរួចហើយឆ្លងកាត់ព្រំដែនដែលក្នុងអង្គភាពនីមួយៗមានទាហានប្រហែល ៧០០ ទៅ ៩០០ នាក់ ។

នៅក្នុងការបង្ហោះនៅលើ Facebook អគ្គសេនាធិការនៃកងកម្លាំងប្រដាប់អាវុធអ៊ុយក្រែនបាននិយាយថា កងទ័ពរុស្ស៊ីកំពុងចាប់ផ្តើមសកម្មភាពយោធាពេញទំហឹងប្រឆាំងនឹងអ៊ុយក្រែន ។

ការវាយលុកបានកើតឡើងជាបន្តបន្ទាប់ដែលនាំឲ្យមនុស្សរាប់រយនាក់ត្រូវបានសម្លាប់ ឬរងរបួស ខណៈកាមេរ៉ាវីដេអូពីទូរទស្សន៍ CCTV ថតបានរថយន្តយោធារុស្ស៊ីកំពុងធ្វើដំណើរឆ្លងកាត់ប៉ុស្តិ៍ត្រួតពិនិត្យរបស់កងកម្លាំងព្រំដែន ខណៈដែលកងទ័ពជើងគោកបានឆ្លងកាត់ព្រំដែនគ្រីមៀចូលទៅក្នុងអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Independent

ចុចអាន ៖ បងប្អូនអតីតអ្នកប្រដាល់ត្រកូល Klitschko ព្រមានកាន់អាវុធប្រយុទ្ធជាមួយ រុស្ស៊ី